विद्यालयको प्रगतिको लागि जनप्रतिनिधि, अभिभावक, र सबै सरोकारवालाहरूको सामूहिक र सत्प्रयास आवश्यक छ : उपाध्यक्ष रामेश्वर सिम्खडा

धादिङबेशी,२२ मंसिर । गङ्गाजमुना  गाउँपालिकाका उपाध्यक्ष रामेश्वर सिम्खडाले  वडा नं. ५ मा अवस्थित कुवापानी आधारभूत विद्यालयको ३३औँ वार्षिकोत्सव (अभिभावक दिवस) समारोहलाई सम्बोधन  गर्नुहुँदै विद्यालयको  शैक्षिक प्रगतिका लागि सामूहिक र सत्प्रयासको महत्वमा जोड दिनुभएको छ।

उपाध्यक्ष सिम्खडाले विद्यालयको ३३औँ वार्षिकोत्सव ‘भव्य र सभ्य रूपमा’ सम्पन्न भएकोमा खुशी व्यक्त गर्दै सम्पूर्ण उपस्थित महानुभाव, शिक्षक, विद्यार्थी र अभिभावकहरूलाई आफ्नो व्यक्तिगत तथा गाउँपालिका कार्यालयको तर्फबाट हार्दिक नमन गर्नुभयो। वार्षिकोत्सवको अवसरमा उहाँले विद्यालयको उत्तरोत्तर प्रगतिको हार्दिक शुभेच्छा समेत व्यक्त गर्नुभयो।

उपाध्यक्ष सिम्खडाले भनेका मुख्य बुँदाहरू:

• वार्षिकोत्सव आगामी वर्षको कार्ययोजना पास गर्ने, योजना बनाउने र विगत वर्षको कार्य प्रगतिको समीक्षा गर्ने महत्वपूर्ण कार्यक्रम हो।

• शिक्षा आर्जनको पहिलो पाठशाला ‘घर’ हो, भने विद्यालय ‘त्यसपछिको पाठशाला’ हो।

• विद्यालयको प्रगतिको लागि जनप्रतिनिधि, अभिभावक, र सबै सरोकारवालाहरूको सामूहिक र सत्प्रयास आवश्यक छ।

 सामुदायिक प्रयास र गाउँपालिकाको सहयोग

उपाध्यक्ष सिम्खडाले विद्यालयलाई समुदायका र राष्ट्रका कर्णधारले शिक्षा आर्जन गर्ने थलोको रूपमा चित्रण गर्नुभयो। उहाँले विद्यालयको प्रगतिमा सम्पूर्ण अभिभावक, विद्यालय संस्थापक, चन्दादाता, अक्षयकोष दाता लगायत सम्पूर्ण शिक्षाप्रेमीहरूको सक्रियता र सहयोगको लागि हार्दिक धन्यवाद र आभार व्यक्त गर्नुभयो।

गाउँपालिकाको तर्फबाट गरिएका प्रयासबारे उहाँले भन्नुभयो, “गङ्गजमुना गाउँपालिकामा ४२ वटा विद्यालयहरू छन्। स्रोत र साधन थोरै भए पनि गाउँपालिका कार्यालय र शिक्षा शाखाले यी सबै ४२ वटै शिक्षालयहरूको शैक्षिक उत्थान र भौतिक संरचनाको विकासका लागि आफ्नो हरबखतभ्याएसम्म लागिपरेको’ छ।”

उहाँले कुवापानी आधारभूत विद्यालयलाई गङ्गाजमुना  गाउँपालिकाको एउटा नमुना शैक्षिक विद्यालय र भौतिक हिसाबले पनि उदाहरणीय बन्न सकोस् भन्ने शुभकामना व्यक्त गर्नु भएको थियो ।