दुधको विकल्पको अनियन्त्रित प्रचार रोक्न धादिङमा अभिमुखीकरण

धादिङ,११ मंसिर
आमाको दुधको महत्व, शिशु स्वास्थ्य तथा आमाको दुधका विकल्पका सामग्रीहरूको अनियन्त्रित प्रचार–प्रसार नियन्त्रणसम्बन्धी कानुनी प्रावधानबारे जनचेतना बढाउने उद्देश्यले धादिङमा अभिमुखीकरण तथा अन्तरक्रिया कार्यक्रम सम्पन्न भएको छ ।
जनस्वास्थ्य कार्यालय धादिङद्धारा आयोजित उक्त कार्यक्रममा स्वास्थ्यकर्मी, स्वास्थ्य क्षेत्रका सरोकारवाला तथा सञ्चारकर्मीहरूको सहभागिता थियो ।
कार्यक्रममा वक्ताहरूले आमाको दुध शिशुको पूर्ण पोषण, रोग प्रतिरोधात्मक क्षमता वृद्धि र समग्र विकासका लागि अत्यन्त आवश्यक हुने उल्लेख गर्दै जन्मेपछि कम्तीमा ६ महिनासम्म आमाको दुध मात्र खुवाउनुपर्नेमा जोड दिए ।
आमाको दुधका विकल्पका सामग्रीहरूको बिक्री–वितरण र प्रचार–प्रसारसम्बन्धी प्रावधान समेटिएको आमाको दुधलाई प्रतिस्थापन गर्ने वस्तु बिक्री वितरण नियन्त्रण ऐन २०४८ तथा नियमावली २०५१ लाई प्रभावकारी रूपमा कार्यान्वयन गर्नुपर्ने आवश्यकतासँगै यसमा चुनौती पनि रहेको सहभागीहरूले बताएका थिए ।
बजारमा आमाको दुधका विकल्पका वस्तुहरू खुला रूपमा प्रदर्शन गरेर उपभोग बढाउने कार्य कानुनविपरीत हुने भएकाले यस्ता गतिविधि रोक्न सबै सम्बद्ध निकाय सक्रिय हुनुपर्ने जनस्वास्थ्य कार्यलयका धादिङका प्रमुख अर्जुन पौडेलले बताउनुभयो ।
जनस्वास्थ्य कार्यालय धादिङका अनुसार कार्यक्रममा सहभागीहरूले शिशु स्वास्थ्य, आमाको दुध संरक्षण तथा सम्बन्धित कानुनी व्यवस्थाबारे थप विस्तृत जानकारी प्राप्त गरेका छन् ।कार्यक्रममा धादिङबेसीका औषधि व्यवसायी तथा जिल्लाका पत्रकारहरूको उपस्थिति रहेको थियो ।