सामाजिक सुरक्षा भत्ता वितरण सेवाग्राहीकै टोलमा

धादिङ,१९ कार्तिक
उत्तरी धादिङको गङ्गाजमुना गाउँपालिकामा सामाजिक सुरक्षा भत्ता वितरण कार्य सुरु भएको छ । गाउँपालिकाले सामाजिक सुरक्षा भत्ता प्राप्त गर्ने वृद्धवृद्धाहरूलाई लक्षित गरी चालु आर्थिक वर्षको सामाजिक सुरक्षा भत्ता वितरण कार्य सुरु गरेको हो ।मंगलबार वडा नं. १ को वडा कार्यालय ताजिम्राङ्बाट भत्ता वितरणको सुरुवात गरिएको वडा नम्बर १ का वडा अध्यक्ष बहादुर तामाङले जानकारी दिनुभयो ।

मंगलबार वडा नम्बर १ मा २ सय ४२ जनालाई सामाजिक सुरक्षा भत्ता वितरण गरिएको उहाँले जानकारी दिनुभयो । सोही क्रममा  कार्तिक १९ गते वडा नं. २, २० गते वडा नं. ३ र २१ गते वडा नं. ४ को वडा कार्यालयमार्फत क्रमशः भत्ता वितरण गरिने कार्यक्रम तय गरिएको बताउनुभयो ।त्यस्तै, अत्यन्त अशक्त र चल्न नसक्ने अवस्थाका वृद्धवृद्धाहरूलाई अवस्था हेरी स्थानीय एसबिआई बैंकका कर्मचारीहरूको सहयोगमा घरमै पुगेर सेवा प्रदान गरिने व्यवस्था गरिएको गाउँपालिकाले जनाएको छ ।

फोटोः पत्रकार नारायण सिलवाल