नेपाल ह्रदय रोग निवारण प्रतिष्ठान धादिङको सातौँ वार्षिक साधारण सभा सम्पन्न

धादिङ,२३ चैत्र ।
नेपाल ह्रदय रोग निवारण प्रतिष्ठान धादिङको सातौँ वार्षिक साधारण सभा सम्पन्न भएको छ । शुक्रबार प्रतिष्ठान धादिङ शाखाका अध्यक्ष राजकुमार श्रेष्ठको अध्यक्षतामा सम्पन्न साधारणसभा जिल्ला समन्वय समिति धादिङका प्रमुख नवराज अधिकारीको प्रमुख आतिथ्यता रहेको थियो ।

कार्यक्रममा प्रतिष्ठानका अध्यक्ष राजकुमार श्रेष्ठले प्रगति प्रतिवेदन तथा आर्थिक प्रतिवेदन प्रस्तुत गर्नुभएको थियो । त्यसैगरी शाखाले सञ्चालन गरेका कार्यक्रमहरुको समीक्षा गर्दै आगामी कार्य योजना समेत निर्माण गरेको सचिव विष्णुलाल श्रेष्ठले बताउनुभयो ।

साधारण सभामा शुभकामना मन्तव्य राख्नुहुँदै जिल्ला समन्वय समिति धादिङका प्रमुख नवराज अधिकारीले मुटु जोगाउने अभयानमा निरन्तर लाग्न सबैसंग आग्रह गर्नुभयो । अधिकारीले अहिले मानवमा लागेको रोगको प्रकृति हेर्दा मुटुरोगले भयावह रुप लिन लागेको समयमा प्रतिष्ठानले उल्लेख्य काम गरेको प्रशंसा गर्नुभयो ।

त्यसैगरी कार्यक्रममा धादिङका प्रमुख जिल्ला अधिकारी बद्रीनाथ गैह्रेले नसर्ने रोगहरु मध्ये मुटुरोगको समस्या तिब्र गतिमा बढेको बताउँदै मानिसको आहार, विहार र व्यायामले यसमा सुधार ल्याउन सकिने धारणा राख्नु भयो । उहाँले गजल मार्फत आफनो मुटु बचाउनको लागि सन्देश पनि दिनुभएको थियो ।

नीलकण्ठ नगरपालिकाका प्रमुख प्रशासकिय अधिकृत पुरुषोत्तम सुवेदीले बजारमा आएका जंग फुड र वातावरणीय परिवर्तनका कारण स्वास्थ्य समस्या बढेको बताउनुभयो । नसर्ने रोगबाट बच्नको लागि स्वयम व्यक्ति आफै जिम्मेवार हुनुपर्ने बतानुभयो । नीलकण्ठ नगरपालिकाले मुटु रोगबारे सचेतना तथा स्वास्थ्य शिविरहरु संचालन गरिरहेको बताउनुभयो ।

साधारण सभामा धादिङ अस्पतालका निमित्त मेडिकल सुपरिटेण्ड्न्ट डा. दिनेश रेमीले मुटुरोग, मुटुरोगका असरहरु र रोकथाम तथा उपचारका विषयमा जानकारी गराउनु भएको थियो । साथै विभिन्न समयमा सञ्चालन गरेको स्वास्थ्य शिविरमा सहयोग गर्ने व्यक्ति तथा संस्थालाई सम्मान पनि गरिएको थियो ।

कार्यक्रममा उपप्रमुख कुलमान विश्वकर्मा, जिल्ला प्रशासन कार्यलय धादिङ प्रमुख जिल्ला अधिकारी बद्रीनाथ गैह्रे, नीलकण्ठ नगरपालिकाका प्रमुख प्रशासकिय अधिकृत पुरुषोत्तम सुवेदी लगायतको आतिथ्यता रहेको थियो ।