नेपाल शिक्षक संघ बागमतीको अध्यक्षमा धादिङको दिपक सिंखडा निर्वाचित

धादिङ १३,चैत ।
नेपाल शिक्षक संघ बागमती प्रदेशको दोस्रो अधिवेशन हेटौडामा सम्पन्न भएको छ । दोस्रो अधिवेशबाट अध्यक्षमा २ सय ४५ मतका साथ दीपक सिंखडा निर्वाचित हुनुभएको छ ।
त्यसैगरि वरिष्ठ उपाध्यक्षमा डा.टंकप्रसाद दाहाल १ सय ७४ मत ल्याई निर्वाचित हुनुभएको छ भने उपाध्यक्षमा कमलाकुमारी थापा, दीपशंकर चौलागाई र अनिलकुमार झा निर्वाचित भएका छन् । महासचिवमा राजेशराज महत निर्विरोध निर्वाचित भएका छन् भने अर्थ महासचिवमा शान्ति गजुरेल पनि निर्विरोध निर्वाचित हुनुभएको हो ।

खुल्ला उपमहासचिवमा रुद्रकुमार धमला, अर्थ उपमहासचिवमा अर्जुनप्रसाद लामिछाने , उपमहासचिवमा रश्मी तामाङ निर्विरोध निर्वाचित हुनभएको छ भने समावेशी तर्फबाट उपमहासचिवमा ओमप्रकाश बन्जाडे र भेषराज उपाध्याय निर्वाचित भएका छन् । अधिवेशनले अध्यक्षसहित २७ सदस्यीय कार्य समिति निर्वाचित गरेको छ । नेपाल शिक्षक संघको दोस्रो अधिवेशनमा बागमती प्रदेशका १३ जिल्लाबाट शिक्षकहरु सहभागिता भएका छन् ।

नेपाल शिक्षक संघ बागमतीको अध्यक्षमा निर्वाचित भएपछि सिंखडाले शिक्षक संघ सधैं शिक्षा र शिक्षकको पक्षमा उभिँदै आएको बताउनुहुँदै शिक्षाको समग्र विकास र शिक्षाको पक्षमा उभिदै आएको नेपालको ठूलो संस्था रहेको बताउनुभयो ।