विश्व क्षयरोग दिवसः नीलकण्ठ नगरपालिकामा मात्रै २९ जना क्षयरोगको विरामी

धादिङ,१० चैत
धादिङ सहित विश्वभर शुक्रबार १ सय ४१ औं विश्व क्षयरोग दिवस मनाइएको छ । ‘हो ! हामी क्षयरोग अन्त्य गर्छौं’ भन्ने मूल नाराका साथ धादिङबेसीमा विश्व क्षयरोग दिवस मनाइएको हो ।नीलकण्ठ नगरपालिका, स्वास्थ्य कार्यालय धादिङ र नेपाल क्षयरोग निवारण संस्था जिल्ला शाखा धादिङको आयोजनामा उक्त कार्यक्रम सम्पन्न भएको हो । स्वास्थ्य कार्यालय धादिङको तथ्यांक अनुसार धादिङमा क्षयरोगका बिरामी आर्थिक वर्ष २०७६/७७ मा २ सय ७० जना,०७७/०७८ मा २ सय ९ जना , ०७८/७९ मा ३ सय १४ जना र चालु आर्थिक वर्ष २०७९/८० मा १ सय ४८ जना भेटिएका छन् ।

यो चालु आर्थिक वर्षको तथ्यांक हेर्दा सबैभन्दा बढी निलकण्ठ नगरपालिकामा २९ जना क्षयरोग बिरामी भेटिएका छन् भने सबैभन्दा कम रुवीभ्याली र खनियाबासमा ३/३ जना क्षयरोगका बिरामीको उपचार भइरहेको छ ।नेपालमा वर्षेनी नयाँ क्षयरोगका ६९ हजार बिरामी भेटिने गरेका छन् । हरेक वर्ष १७ हजार व्यक्तिको क्षयरोगका कारण निधन हुने गरेको नेपाल क्षयरोग निवारण संस्था जिल्ला शाखा धादिङका सभापति श्रीकृष्ण अधिकारीले दिनुभयो । नियमित औषधि खाए रोग निको हुने उहाँ बताउनुहुन्छ ।

आर्थिक वर्ष २०७८–७९ मा नेपालमा ३७ हजार आठ सय ६१ विश्व क्षयरोगका बिरामीको उपचार हुने गरेकामा ९१ दशमलव पाँच प्रतिशत बिरामी निको हुने गरेका छन् । क्षयरोगीमध्ये ६१ दशमलव छ प्रतिशत पुरुष, ३८ दशमलव चार प्रतिशत महिला र आठ दशमलव सात प्रतिशत (१५ वर्षभन्दा मुनिका बालबालिका) रहेका छन् ।विश्व स्वास्थ्य सङ्गठनले सन् २०२१ देखि नेपाललाई औषधि प्रतिरोधी क्षयरोगको उच्च प्रकोप भएका ३० देशको सूचीमा समावेश गरेको छ ।

आव २०७८/७९ मा राष्ट्रिय क्षयरोग कार्यक्रममा नौ सय ४२ जनामा औषधि प्रतिरोधी क्षयरोग पहिचान भएको थियो भने छ सय ५९ जना मात्र उपचारमा थिए ।विश्व स्वास्थ्य सङ्गठनको वार्षिक प्रतिवेदन २०२२ अनुसार सन् २०२१ मा संसारभरि ६० लाख पुरुष, ३४ लाख महिला र १२ लाख बालबालिका गरी एक करोड छ लाख मानिस क्षयरोगबाट ग्रसित हुने गरेका छन् ।सन् २०२१ मा करिब १६ लाखको क्षयरोगका कारण विश्वभरि मृत्यु भएको थियो ।