नीलकण्ठ बहुमुखी क्याम्पसमा शैक्षिक प्रदर्शनी

धादिङ,२० फागुन ।
धादिङ जिल्ला सदरमुकाममा अवस्थित क्यू.ए.ए.मान्यता प्राप्त नीलकण्ठ बहुमुखी क्याम्प प्राङगणमा शैक्षिक प्रदर्शनी कार्यक्रम शुक्रबार सम्पन्न भएको छ ।क्याम्पसको बार्षिक क्यालेन्डरमा उल्लेख भएअनुसार गणित शिक्षा बिभागले शैक्षिक प्रदर्शनी कार्यक्रमको आयोजना गरेको हो । गणित शिक्षा,स्वास्थ्य तथा जनसंङख्या र साधारण शिक्षा बिभाग प्रमुख हरि लम्सालको अध्यक्षतामा सम्पन्न भएको कार्यक्रममा क्याम्पस सञ्चालक समितीका अध्यक्ष शम्भुकुमार श्रेष्ठको प्रमुख आतिथ्यता रहेको थियो ।

कार्यक्रममा बिद्यार्थीहरुले ५ दिनको शैक्षिक सामग्री कार्यशालामा निर्माण गरिएका सामग्रीहरु प्रदर्शनी गरेका थिए । कार्यक्रममा बिशेष अतिथी तथा क्याम्पस प्रमुख नवराज शर्माले शिक्षण सिकाई क्रियाकलापमा शैक्षिक सामग्रीको महत्वपूर्ण भूमिका हुने र शैक्षिक सामग्रीको प्रयोबाट नै बिद्यार्थीहरुको सिकाई दिगो हुने मान्यता रहेको बताउनुभयो ।

त्यस्तै कार्यक्रमका गणित बिभाग प्रमुख हरि लम्सालले यस प्रदर्शनीबाट बिद्यार्थीहरुले धेरै कुराहरु सिक्ने र सिकेका कुराहरु आफु कार्यरत संस्थाहरुमा गणितीय बिषयबस्तु सिकाउनका लागि सहज ढंगले प्रयोग गर्ने अपेक्षा लिईएको बताउनुभयो । उहाँले बिद्यार्थीहरुलाई सैद्धान्तिक ज्ञान मात्र नभई प्रयोगात्मक रुपमा गणितीय बिषयबस्तु बुझाउनका लागि सामग्रीहरुको निर्माण र प्रदर्शनी गरिएको बताउनुभयो ।कार्यक्रममा गणित बिषयबस्तुसँग सम्बन्धित बिभिन्न सामग्रीहरु प्रदर्शन गरिएको थियो । साथै प्रदर्शनमा राखिएका सामग्रीहरु अवलोकन गर्न बिभिन्न बिद्यालयका शिक्षक तथा बिद्यार्थीहरुको उपस्थिती रहेको थियो ।