सार्वजनिक जग्गाको रेखांकन गर्दै नीलकण्ठ नगरपालिका

धादिङ,१५ फागुन
धादिङबेसीको अरुण खोला र थोपल खोला आसपासको क्षेत्रमा नीलकण्ठ नगरपालिकाले सार्वजनिक जग्गाको रेखांकन गर्न सुरु गरेको छ।धादिङबेसी बजारक्षेत्र र बजार क्षेत्रमा पर्ने थोपल खोला,अरुण खोला र आँसी खोलाको सिमा तथा आसपासका सरकारी तथा सार्वजनिक जग्गाको क्षेत्रफलको रेखांकन गर्ने कार्य पुछारबजार पेट्रोलपम्पबाट सुरु गरीएको हो।खोला क्षेत्रको सार्वजनिक जग्गा अतिक्रमण गर्दा खोलाले पुर्याउने क्षती कम गर्नको लागि रेखांकन गरेर बस्तीलाई जोखिमबाट जोगाउनको लागि रेखांकन गरीएको हो ।रेखांकन गरिएका सार्वजनिक जग्गामा रहेका खेती र घर टहराहरुलाई तत्कालको लागि केही नगरे पनि नगरसभाको निर्णयबाट कार्बाही प्रक्रिया अगाडि बढाइने वडा नम्बर ३ का अध्यक्ष राजकुमार श्रेष्ठले जानकारी दिनुभयो ।

दिनप्रतिदिन नागरिकहरुले राज्यले के गर्छ र भन्ने मनोबलले सार्वजनिक जग्गा अतिक्रमण गरिरहदा त्यस्ता व्यक्तिहरुको लागि यसले सजग गराएको स्थानीय विनोद कुमार श्रेष्ठले बताउनुभयो। सार्वजनिक जग्गाको अतिक्रमणको विषयमा विगत ४ वर्ष देखि नै सार्वजनिक जग्गामा बनाईएका भौतिक संरचनाहरु हटाउन नरगपालिकालाई घचघचाउने काम गर्दै आएको टोल विकास संस्था महासंघ धादिङका अध्यक्ष नरबहादुर श्रेष्ठले बताउनुभयो ।सरकारी तथा सार्वजनिक जग्गा मिचेर कसैले जबरजस्ती निर्माण गरेमा स्थानीय सरकार सन्चालन ऐन २०७४ को दफा ४१ को उपदफा(१) र(२) बमोजिम भत्काउने खर्च समेत सम्बन्धीत निर्माण कर्ताबाट असुल उपर गरी आवश्यक कानुनी कारबाहीको प्रक्रिया अगाडी बढाउने नगरपालिकाको बिपद् व्यवस्थापन सम्बन्धी बैठकले निर्णय गरेको थियो ।

बैठकले सरकारी तथा सार्वजनिक जग्गा मिचेर घर टहरा निर्माण गरे कानुनी अनुसार कारबाही गर्ने निर्णय समेत गरेको छ । असार साउनमा थोपल खोला र अरुण खोला आसपासको क्षेत्रको तथ्यांक लिएको र सोही तथ्यांकको आधारमा रिपोर्ट तयारी गरि खोला आसपासको सार्वजनिक जग्गा व्यक्तिले अतिक्रमण नगरुन् भनेर रेखांकन गर्न सुरु गरिएको नीलकण्ठ नगरपालिकाका अमिन दान बहादुर कुमालले बताउनुभयो।