न्यु किबो बोर्डिङ स्कुलमा विद्यार्थी तथा अभिभावक मनोपारामर्श कार्यक्रम सम्पन्न

धादिङ,१ चैत

धादिङको नीलकण्ठ नगरपालिका वडा नम्बर ३ स्थित न्यु किबो बोर्डिङ स्कुलको आयोजनामा विद्यार्थी तथा अभिभावक लक्षित मनोपारामर्श कार्यक्रम शनिवार सम्पन्न भएको छ।बालबालिकाहरुमा देखिने व्यवहारिक समस्या कम गर्न र पढाई प्रति थप जिम्मेवार बनाउने उदेश्यले कार्यक्रम आयोजना गरीएको विद्यालयका प्रिन्सिपल प्रयार रेग्मीले जानकारी दिनुभयो । आजको व्यस्त जीवनशैली र बढ्दो शैक्षिक दबाबका कारण बालबालिकामा देखिन सक्ने मानसिक तनाव, आत्मविश्वासको कमी तथा भावनात्मक असन्तुलनलाई मध्यनजर गर्दै कक्षा ८ का बालबालिका र अभिभावकहरुलाई लक्षित गर्ने कार्यक्रम आयोजना गरीएको रेग्मीले नीलकण्ठ एफएमलाई जानकारी दिनुभयो ।

कार्यक्रममा नीलकण्ठ नगरपालिकाका सिनियर मनोपरामर्शकर्ता रामकुमार थापाले बालबालिकाको मानसिक स्वास्थ्य, सकारात्मक सोच, अभिभावकको भूमिका तथा विद्यार्थीलाई सही मार्गदर्शन दिन आवश्यक विषयमा सहजिकरण गर्नुभएको थियो । थापाले बालबालिकाको उज्ज्वल भविष्यका लागि शिक्षा मात्र पर्याप्त नहुने उल्लेख गर्दै सही मार्गदर्शन, अभिभावकको माया र सकारात्मक वातावरण पनि उत्तिकै महत्वपूर्ण हुने बताउनुभयो।कार्यक्रमले अभिभावक र विद्यार्थीबीच समझदारी, संवाद तथा विश्वासलाई अझ सुदृढ बनाउन सहयोग पुगेको विद्यालयको विश्वास छ।

साथै यस्ता कार्यक्रमले विद्यार्थीको मानसिक स्वास्थ्य सुधार गर्न, अभिभावक र विद्यालयबीच समन्वय तथा सहकार्य बढाउन र बालबालिकालाई आत्मविश्वासी, जिम्मेवार तथा सकारात्मक बन्न प्रेरित गर्ने अपेक्षा गरिएको छ।विद्यालयका अनुसार यस्ता कार्यक्रमले बालबालिकाको व्यवहारमा सकारात्मक परिवर्तन ल्याउन र समस्यालाई समयमै बुझेर समाधान गर्ने वातावरण बनाउन समेत मद्दत गर्नेछ। कार्यक्रम पश्चात विद्यार्थीहरुले आफुले तालिममा सिकेको कुराहरुलाई व्यवहारमा लागु गर्ने प्रतिबद्धता व्यक्त गर्नुभएको थियो । साथै अभिभावकहरुले यस्ता कार्यक्रम प्रत्येक कक्षाहरुमा सन्चालन गर्नुपर्ने बताउनुभएको थियो ।