नीलकण्ठ नगरपालिकाको नगरसभा सम्पन्न ,आ.व २०८२/०८३ को नीति तथा कार्यक्रम पारित

धादिङ, असार ६ गते ।
नीलकण्ठ नगरपालिकाको नगरसभाको १७ औं अधिवेशन सम्पन्न भएको छ। अधिवेशनमा नगरप्रमुख भीम प्रसाद ढुंगानाले आर्थिक वर्ष २०८२/०८३ का लागि प्रस्तुत नीति तथा कार्यक्रममाथि गहन छलफलपछि सर्वसम्मत रूपमा स्वीकृत गरिएको छ ।

उक्त नीति तथा कार्यक्रमले नगरको समृद्धि, सुशासन, पूर्वाधार विकास, शिक्षा, स्वास्थ्य, कृषि, रोजगारी, महिला सशक्तिकरण, सामाजिक समावेशिता, पर्यटन प्रवद्र्धन, वातावरण संरक्षणलगायतका क्षेत्रहरूलाई समेटेको छ ।

प्रस्तुत निति तथा कार्यक्रममा शिक्षा क्षेत्रमा ’एक वडा एक नमूना विद्यालय’, विद्यालय समायोजन, गुणस्तरीय शिक्षा अडिट, र विपन्न विद्यार्थीका लागि पोशाक तथा छात्रवृत्तिको व्यवस्था गरिएको छ । स्वास्थ्य क्षेत्रमा हरेक वडामा एक स्वास्थ्य संस्था, मोवाइल स्वास्थ्य सेवा, टोल–टोलमा स्वास्थ्य परीक्षण, र विशेषज्ञ तथा टेलिमेडिसिन सेवा संचालन गरिने निति लिएको छ ।

कृषि तथा पशुपालनमा आत्मनिर्भरता, एक वडा एक उत्पादन, व्यवसायिक कृषि प्रवद्र्धन, माटो परीक्षण र बजारिकरणमा विशेष ध्यान दिईने भएको छ।

पूर्वाधार क्षेत्रमा सबै वडा केन्द्रसम्म कालोपत्रे सडक, स्वच्छ खानेपानी आपूर्ति, विद्युतीय नक्सापास प्रणाली, र नमूना बस्तीको योजना रहेको छ । रोजगारी र उद्यमशीलता ः स्वरोजगार, मेयर उद्यमशीलता कार्यक्रम, शिप तथा तालिम, र विना धितो ऋणको प्रावधानलाई निरन्तरता दिएको छ ।

पर्यटन प्रवद्र्धनमा भैरवी मन्दिर, रामकोट दरबार, नीलकण्ठेश्वर पार्क जस्ता गन्तव्यहरूको विकास र होमस्टे प्रवद्र्धन गर्ने कार्यक्रम रहेको छ।
आगामी बर्षमा महिला, बालबालिका, जेष्ठ नागरिक, दलित, अपांगता भएका व्यक्तिहरूको अधिकार प्रवद्र्धनमा विशेष बजेटको ब्यवस्था गरिएको छ । नीलकण्ठ नगरपालिकाले नगर भित्र सञ्चालित सञ्चार माध्यमहरूसँग सहकार्य, पत्रकार पुरस्कार र सूचना प्रविधि नीति लागू गर्ने प्रतिबद्धता ब्यक्त गरिएको छ ।

नगरप्रमुख ढुंगानाले यो नीति तथा कार्यक्रम केवल घोषणा मात्र नभई कार्यान्वयनको स्पष्ट खाका र संविधान प्रदत्त अधिकारको प्रयोग गर्दै नगर समृद्धिको दिशामा अग्रसर हुने अठोट रहेको बताउनुभयो ।

अधिबेशनमा नगर उप–प्रमुख दिपक बिश्वकर्माले १ अरव २२ करोड ९३ लाख ५ हजारको बजेट पेश गर्नु भएको थियो । नगर उप–प्रमुख विश्वकर्माले नगरपालिकाको वर्तमान आवश्यकता, सामाजिक कल्याण र दीर्घकालिन सोचका साथ भरसक ठुला दिगो बिकासमा टेवा पुग्ने र नगरबासीहरुको जीवन स्तरमा सरोकार राख्ने प्रकृतिको योजनाहरु एवम् रोजगारी सृजना गर्न सक्ने योजनाहरुलाई प्राथमिकतामा राखी बजेट निर्माण गरेको बताउनु भयो ।