शंखादेवी माविमा शिक्षक–अभिभावक संघ पुनर्गठन, अध्यक्षमा डल्लाकोटी

धादिङ, १४ कात्तिक । धादिङको बेनीघाट रोराङ गाउँपालिका–९, मझिमटारस्थित शंखादेवी माध्यमिक विद्यालयमा शिक्षक–अभिभावक संघ पुनर्गठन गरिएको छ । शुक्रबार सम्पन्न अभिभावक भेलाले भूमि डल्लाकोटीको अध्यक्षतामा ११ सदस्यीय शिक्षक–अभिभावक संघ गठन गरेको हो ।

विद्यालय परिसरमा आयोजित भेलाले विद्यालय व्यवस्थापन समितिका लागि चार जना अभिभावक प्रतिनिधिसमेत चयन गरेको छ । यसरी चयन हुने अभिभावकहरुमा सन्तोष पौडेल,चन्द्र कुमारी लायो मगर, चन्द्र कुमारी शाहि ठकुरी, डोर बहादुर सिँह ठकुरी र सरिता थापा घिमिरे रहेका छन् । समितिको अध्यक्ष भने आगामी सोमबार चयन गरिने कार्यक्रम रहेको छ ।

बेनीघाट रोराङ गाउँपालिकाका उपाध्यक्ष टापबहादुर श्रेष्ठको प्रमुख आतिथ्यमा सम्पन्न कार्यक्रममा वडाका जनप्रतिनिधि, शिक्षक तथा अभिभावकहरूको सहभागिता रहेको थियो । गाउँपालिकाको शिक्षा शाखाका स्रोतव्यक्ति रामेश्वर पोखरेलको संयोजकत्वमा विद्यालय व्यवस्थापन समिति तथा शिक्षक–अभिभावक संघ पुनर्गठनको प्रक्रिया सञ्चालन गरिएको हो ।

शिक्षा नियमावली, २०५९ को दशौँ संशोधनले विद्यालय व्यवस्थापन समितिका अध्यक्ष तथा सदस्यको योग्यतासम्बन्धी व्यवस्थामा परिवर्तन गरेको छ । संशोधित व्यवस्थाअनुसार समिति गठन हुनुभन्दा अघिल्लो पाँच वर्षको अवधिमा राजनीतिक दलको सदस्यता लिएको व्यक्ति समितिको अध्यक्ष वा सदस्य बन्न अयोग्य हुने व्यवस्था गरिएको छ ।

त्यसैगरी, शिक्षक वा कर्मचारीबाट अवकाश पाएको दुई वर्ष पूरा नभएका व्यक्तिले पनि व्यवस्थापन समितिको अध्यक्ष वा सदस्य बन्न नपाउने व्यवस्था छ । विद्यालयमा सञ्चालित सबैभन्दा माथिल्लो कक्षा वा सोसरहको परीक्षा उत्तीर्ण नगरेका व्यक्तिलाई समेत समितिमा रहने योग्यतासम्बन्धी प्रतिबन्ध लगाइएको छ ।

सरकारले विद्यालय व्यवस्थापन समितिमा राजनीतिक हस्तक्षेप घटाउने तथा विद्यालयको शैक्षिक प्रशासन र व्यवस्थापनलाई व्यवस्थित बनाउने उद्देश्यसहित नियमावली संशोधन गरेको जनाएको छ ।
नयाँ व्यवस्थाअनुसार विद्यालय व्यवस्थापन समितिको गठन प्रक्रियामा स्थानीय तहको शिक्षा शाखाको भूमिका रहने व्यवस्था गरिएको छ ।

विद्यालयको शैक्षिक गुणस्तर सुधार, पठनपाठनको अनुगमन, पूर्वाधार व्यवस्थापन तथा विद्यालय र अभिभावकबीचको समन्वयमा विद्यालय व्यवस्थापन समिति र शिक्षक–अभिभावक संघको भूमिका रहने गर्दछ ।