पोखरामा लायन्स क्लब अफ धादिङ समाजको औपचारिक चार्टर

धादिङ, १४ कात्तिक । लायन्स इन्टरनेसनल डिस्ट्रिक्ट ३२५ ‘आई’ नेपालअन्तर्गत स्थापित लायन्स क्लब अफ धादिङ समाजको आज पोखरामा औपचारिक उद्घाटन तथा चार्टर गरिएको छ । क्लबले धादिङ र आसपासका क्षेत्रमा स्वास्थ्य, शिक्षा, वातावरण संरक्षण तथा मानवीय सहायताका कार्यक्रम सञ्चालन गर्ने जनाएको छ।

पोखरामा आयोजित डिस्ट्रिक्टको दोस्रो क्याबिनेट बैठकका अवसरमा क्लबको चार्टर गरिएको हो। कार्यक्रममा लायन्स इन्टरनेसनलका अन्तर्राष्ट्रिय निर्देशक राजन लम्साल, डिस्ट्रिक्ट गभर्नर सूर्यकुमार केसी, प्रथम भाइस डिस्ट्रिक्ट गभर्नर शैलेन्द्रमोहन भट्टराई र द्वितीय भाइस डिस्ट्रिक्ट गभर्नर विष्णुप्रसाद भण्डारीलगायतको उपस्थिति रहेको थियो।

गत असोज २८ गते (१४ अक्टोबर २०२६) चार्टर प्राप्त गरेको क्लबको संस्थापक अध्यक्षमा डा. दिनेश रेग्मी रहेका छन्। लायन्स क्लब अफ काठमाडौं सूर्यमुखीको प्रायोजनमा स्थापना भएको क्लबमा २० जना संस्थापक सदस्य आबद्ध छन्।

क्लबका संस्थापक अध्यक्ष डा. रेग्मीले सामाजिक तथा मानवीय सेवाका गतिविधिलाई प्राथमिकतामा राखेर काम गर्ने बताएका छन्। उनका अनुसार स्थानीय समुदायको आवश्यकता पहिचान गरी स्वास्थ्य सेवा तथा जनचेतना अभिवृद्धि, शिक्षा प्रवर्द्धन, वातावरण संरक्षण र सामाजिक सचेतनाका कार्यक्रम सञ्चालन गर्ने क्लबको योजना छ।

क्लबले यसअघि सार्वजनिक गरेको कार्ययोजनामा रक्तदान, सामुदायिक स्वास्थ्यसम्बन्धी सचेतना, विपद् प्रभावितलाई राहत तथा मानवीय सहयोग, विद्यार्थीलाई शैक्षिक सामग्री सहयोग र वृक्षरोपणलगायतका कार्यक्रमलाई प्राथमिकतामा राखिएको छ। यस्ता कार्यक्रम स्थानीय सरोकारवाला निकाय तथा विभिन्न सामाजिक संस्थासँगको सहकार्यमा सञ्चालन गर्ने क्लबको लक्ष्य छ।

उद्घाटन कार्यक्रममा क्लबका कोषाध्यक्ष डा. प्रियजन पाण्डे र सहसचिव डा. अनिल गुरुङको सहभागिता रहेको थियो। त्यसैगरी प्रायोजक क्लब लायन्स क्लब अफ काठमाडौं सूर्यमुखीका अध्यक्ष राजाराम रिजाल तथा लायन्स क्लब अफ धादिङ मण्डलीका अध्यक्ष हरिकुमार श्रेष्ठ, सचिव प्रदीप ढकाल र सेवा कार्यक्रम संयोजक राम श्रेष्ठलगायत विभिन्न क्लबका प्रतिनिधि सहभागी थिए।

लायन्स इन्टरनेसनलको ‘वी सर्भ’ अर्थात् ‘हामी सेवा गर्छौँ’ भन्ने मूल मान्यताअनुसार समुदायको आवश्यकतामा आधारित सेवामूलक कार्यक्रम सञ्चालन गर्ने प्रतिबद्धता क्लबले व्यक्त गरेको छ।