नीलकण्ठका ४१ सहकारीका कर्मचारीलाई दुई दिने क्षमता विकास तालिम

धादिङ,२७ असोज
नीलकण्ठ नगरपालिकाको आयोजना सहकारी सदस्यहरुलागि आयोजित दुई दिने क्षमता विकास तालिम सम्पन्न भएको छ । दुई दिने तालिममा ४१ वटा सहकारी संस्थाका पदाधिकारी तथा कर्मचारीलाई अभिलेख निर्माण र व्यवस्थापनसम्बन्धी क्षमता विकास तालिम प्रदान गरिएको हो।सहकारी संस्थाको सञ्चालनलाई व्यवस्थित, पारदर्शी र सदस्य केन्द्रित बनाउने उद्देश्यले नगरपालिकाको सहकारी शाखाले आयोजना गरेको दुईदिने तालिम बुधबार सम्पन्न भएको हो।

असोज २६ गतेदेखि सुरु भएको तालिम नीलकण्ठ नगरपालिका सहकारी शाखा प्रमुख उर्मिला थपलियाको संयोजकत्वमा सम्पन्न भएको थियो।तालिममा सहकारी बिज्ञ नवीन मैनालीले प्रशिक्षण दिनुभएको थियो ।शाखा प्रमुख थपलियाका अनुसार नगरपालिका भित्रका केही सहकारी संस्थाको अनुगमनका क्रममा विभिन्न समस्या देखिएपछि पदाधिकारी तथा कर्मचारीको क्षमता अभिवृद्धि गर्न तालिम आयोजना गरिएको हो ।तालिमले सहकारीको अभिलेख व्यवस्थापनमा सुधार ल्याउनुका साथै संस्थागत कामकारबाहीलाई थप व्यवस्थित बनाउन सहयोग पुग्ने अपेक्षा गरिएको छ ।प्रशिक्षक मैनालीले सहकारी संस्थालाई सक्षम बनाउन सञ्चालक समिति र व्यवस्थापक मात्र नभई सदस्यसमेत सक्षम हुनुपर्नेमा जोड दिनुभयो ।उहाँले सहकारी शिक्षा तथा सामुदायिक विकास कोषको रकम सदस्यको क्षमता विकास, सहकारीसम्बन्धी ज्ञान अभिवृद्धि र उद्यमशीलता प्रवद्र्धनमा खर्च गर्नुपर्ने बताउनुभयो ।

उहाँका अनुसार सहकारी संस्थाले बचत संकलन र ऋण परिचालनमा मात्र सीमित नभई सदस्यलाई उत्पादनमूलक व्यवसायमा जोड्ने तथा उनीहरूले उत्पादन गरेका वस्तुको बजार व्यवस्थापनमा समेत सहयोग गर्नुपर्छ। सदस्यलाई सहकारीको उद्देश्य, अधिकार र जिम्मेवारीबारे जानकारी नहुँदा संस्थाको कामकारबाहीप्रति निगरानी कमजोर हुने उहाँको भनाइ थियो।तालिमबाट सहकारी संस्थाका पदाधिकारी तथा कर्मचारीको कार्यक्षमता अभिवृद्धि हुनुका साथै अभिलेख व्यवस्थापन, संस्थागत सुशासन र सेवा प्रवाहमा सुधार आउने विश्वास नगरपालिकाले लिएको छ ।