नेपाली कांग्रेसको १५औँ महाधिवेशनः केन्द्रीय महाधिवेशन प्रतिनिधिमा यामनाथ दनैको उम्मेदवारी

धादिङ, १३ असोज 
नेपाली कांग्रेसको १५औँ महाधिवेशनअन्तर्गत धादिङ निर्वाचन क्षेत्र नं. २ बाट केन्द्रीय महाधिवेशन प्रतिनिधि पदमा यामनाथ दनैले उम्मेदवारी घोषणा गर्नुभएको छ। ज्वालामुखी गाउँपालिकाका अध्यक्षसमेत रहनुभएका दनैले क्षेत्र नं. २ का क्षेत्रीय प्रतिनिधिहरूसँग साथ, सहयोग र अमूल्य मतका लागि आग्रह गर्नुभएको छ। उम्मेदवारी घोषणा गर्दै उहाँले पार्टीको संगठनलाई थप सुदृढ बनाउन तथा आगामी राजनीतिक यात्रामा प्रतिनिधिहरूको सुझाव र सहयोगलाई सम्मानपूर्वक आत्मसात् गर्ने प्रतिबद्धता व्यक्त गर्नुभएको छ।
वि.स.२०५४ सालमा साविकको चैनपुर गाविस अध्यक्षमा चुनाव लडे पनि पराजित हुनुभएको थियो । उहाँ वि.स.२०४९ देखी २०५३ सम्म आरआर क्याम्पसको स्ववियु विद्यार्थी राजनीतिमा हुनुहुन्थ्यो । वि.स. २०४६ सालको आन्दोलन,२०६३÷०६३ को आन्दोलनमा सक्रिय सहभागिता जनाउनुभएको थियो ।

दनै २०७९ सालको स्थानीय तह निर्वाचनमा नेपाली कांग्रेसका तर्फबाट ज्वालामुखी गाउँपालिकाको अध्यक्षमा निर्वाचित हुनुभएको हो। निर्वाचनमा उहाँले ८ हजार ३४ मत प्राप्त गर्नुभएको थियो ।गाउँपालिका अध्यक्षका रूपमा स्थानीय सरकार सञ्चालनको जिम्मेवारी सम्हाल्दै आउनुभएका दनैले अब पार्टीको केन्द्रीय महाधिवेशन प्रतिनिधिका रूपमा आफ्नो भूमिका विस्तार गर्न खोज्नुभएको हो। उहाँको उम्मेदवारीसँगै धादिङ क्षेत्र नं. २ मा महाधिवेशन प्रतिनिधि चयनका लागि हुने प्रतिस्पर्धा पनि थप चासोको विषय बनेको छ।

उम्मेदवारी घोषणासँगै दनैले क्षेत्रीय प्रतिनिधिहरूलाई सम्बोधन गर्दै आफूलाई विश्वास गरी मत दिन आग्रह गर्नुभएको छ। उहाँले प्रतिनिधिहरूबाट प्राप्त हुने विश्वास, सुझाव र सहयोगलाई आगामी दिनमा पार्टी संगठन निर्माणका लागि उपयोग गर्ने बताउनुभएको छ।कांग्रेसको महाधिवेशन पार्टीको नेतृत्व चयनसँगै नीति, विचार र संगठनात्मक दिशाबारे बहस हुने महत्वपूर्ण अवसरका रूपमा लिइन्छ। यस क्रममा विभिन्न तहमा रहेका नेता तथा कार्यकर्ताले पार्टीको विभिन्न पदमा उम्मेदवारी प्रस्तुत गरिरहेका छन्। धादिङमा पनि वडा, गाउँ÷नगर, प्रदेशसभा क्षेत्र तथा महाधिवेशन प्रतिनिधि तहमा नेतृत्वका लागि उम्मेदवारी दिने क्रम अघि बढेको छ।

दनैको उम्मेदवारीले स्थानीय तहमा जनप्रतिनिधिका रूपमा काम गरिरहेका कांग्रेस नेताहरू पार्टीको उच्च तहको प्रतिनिधित्वमा समेत सक्रिय हुन खोजेको पक्षलाई देखाएको छ। स्थानीय सरकारको अनुभवलाई पार्टीको नीति निर्माण र संगठनात्मक भूमिकासँग जोड्ने अवसरका रूपमा उहाँले आफ्नो उम्मेदवारीलाई अघि सार्नुभएको छ।

महाधिवेशन प्रतिनिधिका रूपमा निर्वाचित भएपछि पार्टीको नीति निर्माण, संगठन सुदृढीकरण र जनतासँग पार्टीको सम्बन्धलाई थप प्रभावकारी बनाउने विषयमा भूमिका खेल्ने अपेक्षा उहाँले व्यक्त गर्नुभएको छ।“सम्पूर्ण क्षेत्रीय प्रतिनिधि साथीहरूबाट साथ, सहयोग र अमूल्य मतको अपेक्षा गरेको छु। यहाँहरूको विश्वास, सुझाव र सहयोगलाई सदैव उच्च सम्मानका साथ आत्मसात् गर्नेछु,” उम्मेदवारी घोषणाका क्रममा दनैले भन्नुभएको छ।धादिङ क्षेत्र नं. २ मा महाधिवेशन प्रतिनिधिका लागि प्रस्तुत भएका उम्मेदवारमध्ये दनै पनि एक हुनुहुन्छ। अब क्षेत्रीय प्रतिनिधिहरूको मतबाट महाधिवेशन प्रतिनिधि चयन हुनेछन्। कांग्रेसको १५औँ महाधिवेशनअन्तर्गत धादिङमा नेतृत्व चयनको प्रक्रिया अघि बढेसँगै विभिन्न तहका उम्मेदवारहरूले आफ्ना एजेन्डा र प्रतिबद्धता सार्वजनिक गरिरहेका छन्।