सामी कार्यक्रमको दुईदिने समीक्षा तथा योजना तर्जुमा गोष्ठी सम्पन्न

धादिङ, १२ कात्तिक

सुरक्षित आप्रवासन (सामी) कार्यक्रमअन्तर्गत सञ्चालित कार्यक्रमको समीक्षा तथा चालु आर्थिक वर्षको योजना तर्जुमा गोष्ठी सम्पन्न भएको छ।दुई दिनसम्म सञ्चालन भएको गोष्ठीमा आर्थिक वर्ष २०८२/०८३ मा भएका कार्यक्रम तथा गतिविधिको समीक्षा गर्दै चालु आर्थिक वर्षका लागि योजना तर्जुमा गरिएको सामी कार्यक्रमका जिल्ला कार्यक्रम संयोजक दिनेश दुवाडीले जानकारी दिनुभयो।

गोष्ठीमा युवा, श्रम तथा रोजगार मन्त्रालयअन्तर्गत सामी कार्यक्रमका बागमती प्रदेश संयोजक सागर विक्रम बस्नेत, कार्यक्रम अधिकृत भोजराज सुनुवार र जिल्ला कार्यक्रम संयोजक दुवाडीले सहजीकरण गर्नुभएको थियो। कार्यक्रममा जिल्लाका १० स्थानीय तहका रोजगार संयोजक, वित्तीय साक्षरता सहजकर्ता, मनोसामाजिक परामर्शकर्ता तथा रिटर्नी स्वयंसेवकहरूको सहभागिता रहेको थियो।

गोष्ठीको समापन समारोहलाई सम्बोधन गर्दै नीलकण्ठ नगरपालिकाका निमित्त प्रमुख प्रशासकीय अधिकृत तथा वरिष्ठ जनस्वास्थ्य अधिकृत विष्णुप्रसाद रिजालले सामी कार्यक्रमले सञ्चालन गर्दै आएका विभिन्न पाँचवटा विषयले नागरिकलाई सही सूचना प्रदान गर्नुका साथै ठूलो राहत पुर्‍याएको बताउनुभयो।

उहाँले विशेषगरी मानसिक स्वास्थ्य तथा वित्तीय साक्षरतासम्बन्धी कार्यक्रमले नागरिकको जीवनशैलीमा सकारात्मक परिवर्तन ल्याउन महत्वपूर्ण भूमिका खेलेको उल्लेख गर्नुभयो।सामी कार्यक्रम जिल्लाका १० स्थानीय तहमा सञ्चालन हुँदै आएको छ। कार्यक्रममार्फत वैदेशिक रोजगारीमा जान चाहने तथा वैदेशिक रोजगारीमा रहेका श्रमिक र उनीहरूका परिवारलाई सही सूचना तथा परामर्श, न्यायमा पहुँच, मनोसामाजिक परामर्श, वित्तीय साक्षरता र सूचना प्रवाहसम्बन्धी सेवा प्रदान गरिँदै आएको छ।

त्यसैगरी, वैदेशिक रोजगारीका क्रममा अलपत्र परेका, बेपत्ता भएका, सम्पर्कविहीन भएका तथा नेपालमै वैदेशिक रोजगारसम्बन्धी ठगीमा परेका व्यक्तिहरूलाई आवश्यक सहजीकरण र सहयोगसमेत गर्दै आएको छ।सामी कार्यक्रमले वैदेशिक रोजगारीलाई सुरक्षित, व्यवस्थित र मर्यादित बनाउन तथा वैदेशिक रोजगारीका क्रममा हुन सक्ने जोखिम न्यूनीकरण गर्न महत्वपूर्ण भूमिका निर्वाह गर्दै आएको छ।