धादिङ–२ ‘क’ बाट इन्जिनियर मोतीराम इटनी प्रदेश प्रतिनिधिमा निर्विरोध निर्वाचित

धादिङबेशी,१३ असोज । नेपाली कांग्रेसको १५औँ महाधिवेशनअन्तर्गत धादिङ प्रतिनिधिसभा क्षेत्र नं. २ ‘क’ बाट प्रदेश प्रतिनिधि (पेशागत विषयविज्ञ) पदमा एरोनोटिकल इन्जिनियर मोतीराम इटनी निर्विरोध निर्वाचित भएका छन्।

पेशागत विषयविज्ञतर्फ इटनीको मात्रै उम्मेदवारी कायम भएपछि उनी प्रदेश प्रतिनिधिमा निर्विरोध निर्वाचित भएका हुन्। उम्मेदवारी दर्ताका क्रममा उनले आफ्नो पेसागत ज्ञान, अनुभव र क्षमतालाई पार्टी संगठन तथा सार्वजनिक सेवासँग जोडेर अघि बढ्ने प्रतिबद्धता व्यक्त गरेका थिए।

निर्विरोध निर्वाचित भएपछि इटनीले आफूमाथि विश्वास गर्ने क्षेत्रीय प्रतिनिधि, पालिका तथा वडा सभापति, अग्रज नेता, कार्यकर्ता तथा शुभेच्छुकप्रति आभार व्यक्त गरेका छन्। पार्टीको नीति, सिद्धान्त र मूल्यमान्यतालाई आत्मसात् गर्दै संगठनलाई थप सुदृढ, गतिशील र जनमुखी बनाउन आफ्नो क्षमताले भ्याएसम्म योगदान गर्ने उनले बताएका छन्।