सुरक्षित वैदेशिक रोजगारका लागि सचेतना र समन्वयमा जोड

धादिङबेशी,११ कात्तिक । सुरक्षित वैदेशिक रोजगारीका लागि सही सूचना, सीप विकास, कानुनी सहायता र आवश्यक कागजातको व्यवस्थापनमा ध्यान दिनुपर्ने भएको छ । वैदेशिक रोजगारीमा हुन सक्ने ठगीबाट बच्न स्थानीय सरकार, कर्मचारी र जनप्रतिनिधिबीच समन्वय र सहकार्य आवश्यक रहेको सरोकारवालाहरूले बताएका छन् ।

नीलकण्ठ नगरपालिकामा आजदेखि सुरु भएको सुरक्षित आप्रवासन (सामी) कार्यक्रमको दुईदिने वार्षिक समीक्षा तथा योजना तर्जुमा कार्यक्रममा वक्ताहरूले वैदेशिक रोजगारीलाई सुरक्षित र व्यवस्थित बनाउन जनचेतना अभिवृद्धि गर्नुपर्नेमा जोड दिएका हुन् ।

बागमती प्रदेश सरकारका प्रदेश कार्यक्रम संयोजक सागर विक्रम बस्नेतले वैदेशिक रोजगारीमा जानुअघि सही सूचना लिन, आवश्यक सीप तालिम हासिल गर्न र कागजात तयार गर्न आग्रह गर्नुभयो । उहाँले तपाइँ वैदेशिक रोजगारीमा जाने तयारीमा हुनुहुन्छ भने इजाजतप्राप्त म्यानपावरमार्फत मात्र प्रक्रिया अघि बढाउन, आर्थिक कारोबारको प्रमाण सुरक्षित राख्न र आफूले काम गर्ने कम्पनी तथा सम्पर्क विवरण परिवारलाई उपलब्ध गराउनुपर्ने बताउनुभयो ।

बिचौलियाबाट हुन सक्ने ठगीबाट बच्न स्थानीय तहले सामी कार्यक्रमलाई प्राथमिकता दिनुपर्ने उहाँको भनाइ थियो । यसका लागि आवश्यक बजेट र जनशक्तिको व्यवस्थापन गर्नसमेत उहाँले आग्रह गर्नुभयो । कार्यक्रममा सामी कार्यक्रमका जिल्ला कार्यक्रम संयोजक दिनेश दुवाडीद्वारा प्रस्तुत प्रतिवेदनअनुसार आप्रवासी स्रोत केन्द्रबाट हालसम्म ८ हजार १८३ जनाले सेवा लिएका छन् । त्यसैगरी, वित्तीय साक्षरताअन्तर्गत विद्यालयस्तरका २० र समुदायस्तरका २० समूहमा सञ्चालन गरिएका कार्यक्रम शतप्रतिशत सम्पन्न भएका छन् ।

नीलकण्ठ नगरपालिकाका निमित्त प्रमुख प्रशासकीय अधिकृत लोकनाथ उपाध्यायले तपाइँ वैदेशिक रोजगारीका क्रममा कुनै समस्या भोगिरहनुभएको छ भने त्यसको समाधानका लागि सुरुदेखि अन्त्यसम्म सहजीकरण गर्न सम्बन्धित कर्मचारी, जनप्रतिनिधि र निकायबीच सहकार्य आवश्यक रहेको बताउनुभयो ।

उहाँले वैदेशिक रोजगारीमा जानुपर्ने बाध्यता कम गर्न स्वदेशमै रोजगारीका अवसर पहिचान गर्ने, तथ्याङ्क संकलन गर्ने र सीप विकासमा ध्यान दिनुपर्नेमा जोड दिनुभयो । सामी कार्यक्रमका कार्यक्रम अधिकृत भोजराज सुनारले विगतका गतिविधिको समीक्षा गर्दै आगामी कार्यक्रमलाई थप प्रभावकारी बनाउने उद्देश्यले वार्षिक समीक्षा तथा योजना तर्जुमा कार्यक्रम आयोजना गरिएको बताउनुभयो । उहाँले सम्भव भएसम्म स्वदेशमै रोजगारीका अवसर खोज्न र वैदेशिक रोजगारीमा जानैपर्ने अवस्था भए सही सूचना तथा आवश्यक सीप हासिल गरेर मात्र जान आग्रह गर्नुभयो ।

नीलकण्ठ नगरपालिकाका उपप्रमुख दीपक विश्वकर्माको अध्यक्षतामा सुरु भएको कार्यक्रममा विभिन्न स्थानीय तहका मनोसामाजिक परामर्शकर्ता, वित्तीय साक्षरता सहजकर्ता तथा सामी कार्यक्रमका कर्मचारीहरूको सहभागिता रहेको छ । दुई दिनसम्म सञ्चालन हुने कार्यक्रम भोलि सम्पन्न हुनेछ ।