एनआरएनएमा दाहाललाई नेपाल प्रवर्द्धनको जिम्मा, पर्यटनमा नयाँ पहलको संकेत

गैरआवासीय नेपाली संघ (एनआरएनए) ले आफ्नो नेपाल प्रवर्द्धन अभियानलाई थप प्रभावकारी बनाउने उद्देश्यसहित उपाध्यक्ष लोक प्रसाद दाहाललाई नेपाल प्रवर्द्धन विभाग प्रमुखको जिम्मेवारी दिएको छ। ११४औँ अन्तर्राष्ट्रिय समन्वय परिषद् (आईसीसी) बैठकको निर्णयअनुसार सन् २०२५–२०२७ कार्यकालका लागि गरिएको यो नियुक्तिलाई संघभित्र नीति–कार्यक्रम कार्यान्वयनमा गति दिने प्रयासका रूपमा हेरिएको छ। अध्यक्ष डा. हेमराज शर्मा र महासचिव डा. चिरञ्जीवी खड्काले दाहाललाई पठाएको औपचारिक पत्रमा विभागको स्पष्ट कार्यविधि र परिणाममुखी कार्ययोजना तयार गर्न भनिएको छ।

यसले विगतमा प्रायः घोषणामै सीमित रहने प्रवर्द्धन कार्यक्रमलाई कार्यान्वयनमुखी बनाउने अपेक्षा गरिएको छ। दाहालले अधिकतम १७ सदस्यीय कार्यसमिति र ५ जना विज्ञ सल्लाहकार प्रस्ताव गर्ने तयारी गरेसँगै विभागलाई संस्थागत रूपमा सुदृढ बनाउने स्पष्ट पार्नुभएको छ । एनआरएनएभित्र नेपाल प्रवर्द्धन विभागलाई लामो समयदेखि ‘सम्भावना धेरै, उपलब्धि सीमित’ रहेको इकाइका रूपमा आलोचना हुँदै आएको छ। विशेषतः पर्यटन, लगानी र सांस्कृतिक कूटनीतिमा प्रवासी नेपालीको सञ्जाल प्रभावकारी रूपमा परिचालन हुन नसकेको गुनासो रहँदै आएको अवस्थामा दाहालको नियुक्ति सुधारको अवसरका रूपमा हेरिएको छ। क

र्मथलो बेल्जियम रहेका दाहाल पर्यटन क्षेत्रसँग नजिक रहेर काम गरेका कारण व्यवहारिक अनुभव भएका व्यक्तिका रूपमा चिनिनुहुन्छ। उहाँले उच्च हिमाली दौड आयोजना गर्ने अवधारणा अघि सार्नुभएको छ। जसले साहसिक पर्यटन प्रवर्द्धनसँगै अन्तर्राष्ट्रिय ध्यान आकर्षित गर्न सक्ने अपेक्षा गरिएको छ। हिमाल आरोही र भरियाबीचको सम्बन्ध सुदृढ बनाउने उद्देश्यसहितको यस्तो कार्यक्रमले पर्यटन क्षेत्रमा मानवीय आयामसमेत उजागर गर्ने विश्वास गरिएको छ।