न्यायिक प्रणालीलाई व्यवस्थित बनाउँदै समुदायमै छिटो र सहज न्याय दिने काम गरिरहेका छौं : उपाध्यक्ष अर्याल

धादिङबेशी । सिद्धलेक गाउँपालिकाको सभाहलमा सामुदायिक मेलमिलापकर्ताहरूका लागि दुईदिने पुनर्ताजगी तालिम शुक्रबारदेखि संचालन भएको छ । गाउँपालिका न्यायिक समितिको आयोजनामा भएको तालिमको उद्घाटन न्यायिक समिति संयोजक तथा गाउँपालिका उपाध्यक्ष सबिता अर्यालको अध्यक्षतामा सम्पन्न भएको हो । कार्यक्रममा निमित्त प्रमुख प्रशासकीय अधिकृत टिकाराम अधिकारी प्रमुख अतिथि रहनुभएको थियो भने वडा नं. ७ का वडा अध्यक्ष तथा न्यायिक समिति सदस्य सानु गिरीसहित अन्य जनप्रतिनिधि र मेलमिलापकर्ताहरूको सहभागिता रहेको थियो ।

स्थानीय सरकार सञ्चालन ऐन, २०७४ ले स्थानीय तहमा न्यायिक समिति गठन गरी साना विवाद समाधानको जिम्मेवारी दिएको सन्दर्भमा गाउँपालिकाले वडास्तरमै मेलमिलाप प्रणाली सुदृढ गर्न तालिम आयोजना गरेको जनाएको छ । प्रत्येक वडामा मेलमिलापकर्ताको संरचना निर्माण गरी समुदायमै विवाद समाधान गर्ने अभ्यासलाई संस्थागत गर्ने उद्देश्यले यस्तो कार्यक्रम सञ्चालन गरिएको हो ।

कार्यक्रममा बोल्दै वडा अध्यक्ष गिरीले स्थानीय तह नै विवाद समाधानको पहिलो थलो भएको उल्लेख गर्दै वडास्तरमै विवाद मिलाउने परिपाटी विकास गर्नुपर्ने बताउनु भयो । उहाँले समुदायमा विश्वास अभिवृद्धि गर्नुपर्ने चुनौती रहेको औंल्याउँदै मेलमिलाप प्रक्रियालाई प्रभावकारी बनाउन दस्तावेजीकरण र जनचेतना आवश्यक रहेको जानकारी दिनु भएको छ ।

त्यस्तै, उपाध्यक्ष अर्यालले न्यायिक क्षेत्रमा अझ प्रभावकारी काम गर्न ढिलाइ भएको स्वीकार गर्दै अब प्रणालीलाई व्यवस्थित बनाउनुपर्ने बताउनु भयो । उहाँले निष्पक्ष भएर मेलमिलाप प्रक्रियामा संलग्न हुन आग्रह गर्दै समुदायमै छिटो र सहज रूपमा न्याय उपलब्ध गराउने लक्ष्यका साथ तालिम सञ्चालन गरिएको स्पष्ट पार्नु भयो ।