धादिङमा निर्वाचन सुरक्षामा कडाइ : निर्वाचन विरोधी गतिविधि, जुलुस, सभा र ड्रोन उडाउन प्रशासनको कडा निगरानी

धादिङबेशी । प्रतिनिधिसभा सदस्य निर्वाचन–२०८२ लाई शान्तिपूर्ण, निष्पक्ष र पारदर्शी रूपमा सम्पन्न गर्न जिल्ला प्रशासन कार्यालय धादिङले सुरक्षा व्यवस्था कडा बनाएको छ। निर्वाचन कार्यक्रमदेखि परिणाम घोषणा नभएसम्म सुरक्षा संवेदनशीलतालाई मध्यनजर गर्दै प्रशासनले ९ बुँदे निर्णयसहित विशेष सतर्कता अपनाउने जनाएको हो।

गृह मन्त्रालयअन्तर्गत जिल्ला प्रशासन कार्यालय धादिङले बुधबार जारी गरेको प्रेस नोटअनुसार जिल्ला निर्वाचन सुरक्षा समितिको बैठकले निर्वाचन अवधिभर लागू हुने गरी ‘अपरेशनल क्यालेन्डर’ तयार गरी सुरक्षा व्यवस्थापन प्रभावकारी बनाउने निर्णय गरेको छ।

प्रेस नोटमा राजनीतिक दलको आह्वानमा हुन सक्ने निर्वाचन विरोधी गतिविधि, बन्द, हड्ताल, चक्काजाम, घेराउजस्ता कार्यक्रमलाई नियन्त्रण गर्न सुरक्षा निकायबीच समन्वय गरिने उल्लेख छ। यस्ता गतिविधिमा संलग्न व्यक्ति तथा समूहलाई निगरानीमा राखी कानुनअनुसार कारबाही गरिने प्रशासनले स्पष्ट पारेको छ।

सामाजिक सञ्जालमार्फत हुने निर्वाचन विरोधी गतिविधिको सूचना संकलन तथा विश्लेषण गरी दोषीलाई कानुनी दायरामा ल्याइने व्यवस्था गरिएको छ। निर्वाचन अवधिमा जुलुस, आमसभा, कोणसभा र भेला जस्ता कार्यक्रम स्थानीय प्रशासनको अनुमति लिएर मात्र गर्नुपर्नेछ।

त्यस्तै, राजमार्ग तथा अन्य संवेदनशील क्षेत्रमा हुन सक्ने अवरोध तत्काल हटाइने, सुरक्षा निकायको नियमित गस्ती तथा पिकेट व्यवस्थालाई सुदृढ बनाइने निर्णय गरिएको छ। अवैध वा जबर्जस्ती रूपमा चन्दा संकलन, धम्की दिने जस्ता आपराधिक गतिविधिमा संलग्न व्यक्ति वा संस्थामाथि कडा कारबाही गरिने प्रशासनको चेतावनी छ।

निर्वाचन अवधिभर अत्यावश्यक वस्तुको सहज आपूर्ति, भण्डारण, बिक्री वितरण तथा बजार अनुगमनलाई प्रभावकारी बनाइने र अनुमति बिना ड्रोन उडान गरे वा गराएमा कानुनबमोजिम कारबाही हुने प्रशासनले जनाएको छ।

जिल्ला प्रशासन कार्यालय धादिङले निर्वाचन आचारसंहिता–२०८२ को पूर्ण पालना गर्दै निर्वाचनलाई सफल बनाउन राजनीतिक दल, उम्मेदवार, नागरिक समाज, आम नागरिक, मतदाता तथा सञ्चारकर्मीहरूलाई सहकार्य र संयम अपनाउन आग्रह गरेको छ।

प्रेस नोट सहायक प्रमुख जिल्ला अधिकारी एवं सूचना अधिकारी मोहन प्रसाद न्यौपानेको हस्ताक्षरितमा जारी गरिएको छ ।