धादिङमा यात्रुसँग बढी भाडा लिने चालक र गाडी धनीलाई कारबाही , ३२ हजार ६९० रकम यात्रुलाई बसमै फिर्ता

धादिङ,२२ असोज
तोकिएको भाडादरभन्दा बढी भाडा असुल गर्ने सवारी साधनमाथि धादिङ प्रहरीले कारबाही गरेको छ । धादिङबाट काठमाडौं जाने तथा काठमाडौंबाट धादिङ आउने गाडीहरूमा गरिएको चेकजाँचका क्रममा १५ वटा सवारीसाधन कारबाहीमा परेका हुन् ।विजयादशमीको भीडभाडमा मुख्य राजमार्ग र ग्रामीण भित्री सडकहरूमा यात्रुको आवागमन असाधारण रूपमा बढेको अवस्थामा प्रहरीले चेकजाँचलाई कडाइ गरेको थियो । प्रमुख जिल्ला अधिकारी विजयराज सुवेदी, जिल्ला प्रहरी कार्यालय धादिङका प्रहरी उपरीक्षकको टोली तथा ट्राफिक प्रहरीको संयुक्त टोलीले अनुगमन गरेको हो ।कारबाहीमा परेका सवारीसाधन ठूला बसहरू रहेका छन्।

ती गाडीहरूले तोकिएको भाडादरभन्दा बढी रकम असुल गरेको पाइएको जिल्ला प्रहरी कार्यालय धादिङका प्रहरी नायब उपरीक्षक प्रकाश दाहालले जानकारी दिनुभयो। उहाँका अनुसार १५ वटा गाडीबाट २ सय २२ जना यात्रुबाट असुल गरिएको ३२ हजार ६९० रकम यात्रुलाई बसमै फिर्ता गराइएको हो ।“सवारीसाधनहरूले बढी भाडा असुल गर्ने, क्षमता भन्दा बढी यात्रु बोक्ने जस्ता गुनासा आएका थिए । त्यसका आधारमा विभिन्न ठाउँमा आकस्मिक चेकजाँच गरी तत्काल कारबाही गरिएको हो,” प्रहरी नायब उपरीक्षक दाहालले भन्नुभयोे ।प्रहरीले जिल्लाका मुख्य नाकामा चेकपोइन्ट स्थापना गरी अनुगमनलाई तीव्रता दिएको छ । यात्रुबाट गुनासा आए तत्कालै कार्यान्वयन गर्ने प्रणाली अवलम्बन गरिएको जिल्ला प्रहरी कार्यालयले जनाएको छ ।

प्रहरीका अनुसार चाडपर्वको समयमा केही यातायात व्यवसायीहरूले यात्रुको बाध्यता र अवसरलाई उपयोग गरी बढी भाडा लिने गरेको पाइएपछि सचेतना र कारबाही दुवै अघि बढाइएको हो। कारबाहीमा परेका सवारी साधनहरूलाई ट्राफिक नियम अनुसार जरिवाना गरिएको छ ।यातायात व्यवसायीहरूलाई सचेत गराउँदै तोकिएको दरभन्दा बढी भाडा नलिन आग्रह गरिएको प्रहरी नायब उपरीक्षक दाहालले बताउनुभयो । व्यवसायीहरूले चालक र सहचालकहरूलाई सचेत गराउने र सुधार गर्ने प्रतिबद्धता जनाएका छन्।“यात्रीहरूले यदि अझै पनि बढी भाडा लिएको गुनासा भए तुरुन्तै प्रहरी वा ट्राफिकलाई खबर गर्न सक्नुहुन्छ, प्रहरीले तत्काल कारबाही गर्छ,” दाहालले भन्नुभयो ।