डिभिजन बन कार्यालय धादिङ द्धारा नि:शुल्क विरुवा बितरण सुरु

धादिङ । डिभिजन बन कार्यालय धादिङ द्धारा वनजन्य तथा सौन्दर्यमूलक विरुवाहरु निशुल्क वितरण गर्न थालिएको छ । डिभिजन वन कार्यालय धादिङकोे नर्सरीबाट बिरुवाहरु निशुल्क बितरण गर्न थाालिएको हो । बिरुवा बितरणको पहिलो दिन १६ हजार बिरुवा बितरण गरिएको छ ।

वनजन्य विरुवातर्फ चिउरी, कटहर, बडहर,तेजपात, टाँकी ,बकाईनो, कागती, अमला,निमारो,अम्बा, चाँप र कफी रहेका छन् भने सौन्दर्यमूलकतर्फ म्याग्नोस्टिक, रुद्राक्ष, श्रीखण्ड ,धुपी ,अशोका, कल्की,कपुर र नीमका बिरुवा बितरण गरिएको छ ।

डिभिजन वन कार्यालय धादिङका सहायक बन अधिकृत लोकनाथ लम्सालका अनुसार निवेदनका आधारमा व्यक्तिगत १५ वटा सम्म, कार्यालयहरुको लागि ५० वटा, संस्थागत १०० वटा सम्म र सामुदायीक वनहरुलाई क्षेत्र हेरेर २५० वटा सम्म विरुवा उपलब्ध गराईएको छ ।

डिभिजन वन कार्यालय धादिङका डिभिजनल वन अधिकृत अजय बिक्रम मानन्धरले गजुरी गाउँपालिका वडा नं. २ का पन्नालाल मुक्तानलाई अशोकका दुई वटा विरुवा हस्तान्तरण गरी विरुवा वितरण कार्यको शुभारम्भ गरिएको थियो । यस बर्ष डिभिजन बन कार्यालय धादिङले ३६ हजार बिरुवा निशुल्क बितरण गर्ने लक्ष लिएको छ ।