कृषिमा उत्पादन र उत्पादकत्व बढाउन सिद्धलेकका कृषकहरुलाई तालिम

धादिङ,२५ बैशाख 

सिद्धलेक गाउँपालिकामा नर्सरी बिरुवा उत्पादनमा प्लाष्टिक ट्रे र कोकोपिटको प्रयोग र महत्व सम्बन्धी एक दिने तालिम सम्पन्न भएको छ । सिद्धलेक गाउँपालिका कृषि विकास शाखाको आयोजना संचालन भएको तालिममा वडा नम्बर १ का ६० जना कृषकहरुको सहभागिता रहेको थियो।

कृषकहरुलाई उत्पादन र उत्पादकत्व बढाउने र कृषिमा प्रविधिको प्रयोग गर्ने उद्धेले तालिम संचालन गरिएको कृषि विकास शाखा प्रमुख कोमल प्रसाद जोसीले बताउनु भयो ।तालिममा नर्सरी कसरी स्थापना गर्ने, विउ उत्पादन, प्लाष्टीक घरमा तरकारी खेती संचालन गर्ने तरिका, रोग किरा पहिचान तथा व्यवस्थापन, ट्रे भनेको के हो ? कोकोपिट भनेको के हो ? कसरी प्रयोग गर्ने लगायतका विषयमा तालिम दिइएको कृषि विकास शाखा प्रमुख जोसीले बताउनुभयो।

गाउँपालिकाका अध्यक्ष परशुराम खतिवडाको अध्यक्षतामा संचालन भएको तालिममा पालिका उपाध्यक्ष सविता अर्यालको विषेश आतिथ्य रहेको थियो ।कार्यक्रममा प्रमुख प्रशासकिय अधिकृत नारायण प्रसाद अधिकारी , विभिन्न वडाका वडा अध्यक्षहरु, कार्यपालिका सदस्यहरु लगायतको आतिथ्यता रहेको थियो ।आजबाट सुरु भएको तालिम प्रत्येक वडामा एक एक दिन सन्चालन हुने गाउँपालिकाले जनाएको छ । भोली मंगलबार सोहि प्रकारको तालिम वडा नम्बर २ का कृषकहरुलाई दिईने गाउँपालिकाले जनाएको छ ।