काठको ठेकी बनाउने तालिम सिकाउदै नेत्रावती डबजोङ गाउँपालिका

धादिङ,१२ बैशाख ।
नेत्रावती डबजोङ गाउपालिकामा परम्परागत काठको ठेकी बनाउने तालिम संचालन भएको छ । गाउँपालिकाको आयोजनामा परम्परागत काठको ठेकी बनाउने १५ दिने तालिम आईतबारदेखि सुरु भएको हो । आईतबार एक कार्यक्रमका बिच गाउँपालिकाका अध्यक्ष मेघनाथ रिजालले उक्त तालिमको उद्घाटन गर्नुभएको हो ।

लोप हुँदै गएको परम्परागत पेसालाई संरक्षण गर्न र पुस्ता हस्तान्तरण गर्ने उद्धेश्यले तालिम संचालन गरिएको वडा नं ३ का वडा अध्यक्ष सुरेश गुरुङले बताउनुभयो ।वडा नं ३ का १५ जनाको सहभागिता रहेको तालिममा मसिने कामीले प्रशिक्षण दिनुभएको छ । तालिमको उद्घाटन गर्नुहुँदै गाउँपालिका अध्यक्ष मेघनाथ रिजालले परापुर्वकाल देखि चल्दै आएको पेसालाई टिकाइ राख्न, जर्गेना गर्न र सिपलाई एकबाट अर्कोमा हस्तान्तरण गदै जानुपर्छ भन्ने उद्धेश्यले तालिमको आयोजना गरिएको बताउनुभयो ।

ठेकी लगायत काठबाट बनाउने परम्परागत वस्तुलाई पेसामा संचालनमा ल्याएर सिप जर्गेना तथा आर्थिक उन्नती हुने रिजालले बताउनुभयो । गाउँपालिकाले आगामी वर्षहरुमा पुराना परम्पपरालाई खोजी गरेर संरक्षण गर्ने प्रतिबद्धता जनाउनु भयो । उहाँले सहभागीहरुलाई सिपलाई पेसाको रुपमा विकसित गर्नको लागि उत्सुक्ताका साथ सिकेर आफनो क्षमता अभिवृद्धि गर्नको लागि आग्रह गर्नुभएको छ ।

वडा नं ३ का वडा अध्यक्ष सुरेश गुरुङको अध्यक्षता भएको तालिम उद्धघाटन कार्यक्रममा गाउँपालिकाका अध्यक्ष मेघनाथ रिजालको प्रमुख आतिथ्य रहेको थियो । कार्यक्रममा योजना शाखा प्रमुख अनुप लामिछाने, पशु विकास शाखाका अर्जुन प्रसाद खतिवडा, फिल्ड सहायक सुकराम तामाङ र पुर्व वडा सदस्य लगायतको उपस्थिति रहेको थियो ।