शिक्षा सम्बन्धी आकस्मिक कार्ययोजना जारी (यस्ता छन् व्यवस्था)

सरकारले कोभिड १९ का कारण अवरुद्ध भएको विद्यालय शिक्षा सुचारु गर्नका लागि घरघरमा निशुल्क सिमकार्ड वितरण गर्ने देखि विद्यार्थीलाई आ–आफ्नै घरमा पढ्न मिल्ने गरी ‘गृह विद्यालय’ बनाउने सम्मको कार्यक्रमहरु समेटेर विद्यालय शिक्षा सम्बन्धी आकस्मिक कार्ययोजना २०७७ जारी गरेको छ । 

कोभिड १९ का कारण अस्तव्यस्त बन्न पुगेको शैक्षिक सत्रलाई व्यवस्थित बनाउने उद्धेश्यका साथ ३१ वटा बुँदालाई समेटेर आकस्मिक कार्ययोजना तयार पारिएको मन्त्रालयले जनाएको छ ।

कार्ययोजनामा कोरोनाका कारण बसाइ स्थानान्तरण भएका विद्यार्थी (आफुले पढ्ने विद्यालय भन्दा अन्यत्रै बसेका) हरुलाई पनि पायक पर्ने विद्यालयमा नै समेट्नु पर्ने तथा विद्यालयको सेवा क्षेत्र भित्र रहेका सबै विद्यार्थीको प्रविधिसंगको पहुँचताको विवरण पनि संकलन गर्न निर्देशन दिइएको छ । जुन कार्य असोज दोस्रो हप्ता सम्म गरिसक्ने गरी समय तोकिएको छ ।

असोजको पहिलो हप्ता सम्म सबै शिक्षक कार्यस्थलमा पुग्ने तथा दोस्रो हप्ता सम्ममा सेवाक्षेत्रभित्रका सबै विद्यार्थी (स्थान्तरित समेत) भर्ना गर्ने तथा पाठ्यपुस्तक वितरण गर्ने कार्ययोजनामा उल्लेख गरिएको छ ।

शैक्षिक सत्र खेर जान नदिनका लागि समायोजन गरिएको पाठ्यक्रम, मूल्याङ्कन प्रक्रियाको ढाँचा तयार गर्ने, विद्यार्थीका लागि असोज मसान्त भित्र स्वाध्यायन सिकाइ सामाग्री तयार गर्ने योजना बनाइएको छ । यसका साथै स्थानीय तहले समेत निरन्तर रुपमा सिकाइ सामाग्री तयार गरी वितरण गर्न सकिने कार्ययोजनामा उल्लेख गरिएको छ ।

कार्ययोजनाको अर्काे महत्वपूर्ण कार्यक्रमका रुपमा प्रत्येक घरमा कम्तिमा एउटा सिमकार्ड वितरण गर्ने र शिक्षक र विद्यार्थीको अभिभावकको नम्बरलाई क्लोज युजर ग्रुपमा राखी असोज मसान्त भित्रमा निशुल्क रुपमा सम्पर्क गर्न मिल्ने योजना बनाइएको छ ।

 जसका लागि विद्यालय, स्थानीय तह देखि अर्थ मन्त्रालय र शिक्षा, विज्ञान तथा प्रविधि मन्त्रालय सबैको सहयोग लिइने उल्लेख गरिएको छ । यसका साथै विद्यार्थीले स्वअध्ययनका लागि शिक्षा तथा मानव स्रोत विकास केन्द्रको वेवपोर्टल खोल्दा शुल्क नलाग्ने बनाइने समेत कार्ययोजनामा उल्लेख गरिएको छ ।

कोरोना महामारीका कारण विद्यालय सम्म पुग्न नसक्ने बालबालिकाहरुलाई लक्षित गर्दै ‘गृह विद्यालय’ को अवधारणालाई कार्ययोजनामा प्रमुखताका साथ राखिएको छ । जसअन्तरगत प्रत्येक परिवारको एकजनालाई सिकाइ सहजकर्ताका रुपमा छनौट गरी स्वाध्यायन गर्ने कार्यतालिका, माध्यम र सिकाइ सामाग्रीका बारेमा जानकारी दिने तथा बालबालिकाको सिकाइका बारेमा रिपोर्टिङ गर्ने जिम्मेवारी दिइएको छ ।

प्रत्येक विद्यालयमा इन्टरनेट सेवा बिस्तार गर्ने तथा विद्यालय र सिकाइ केन्द्रलाई फ्रि वाइफाइ जोन बनाउने लक्ष्य कार्ययोजनामा समेटिएको छ । प्रत्येक शिक्षकले सिकाइ सहजिकरणको योजना तयार पारी आवश्यकता अनुसार साप्ताहिक रुपमा घरदैलो कार्यक्रम गरी विद्यार्थीको घरघरमा पुगी सिकाइ सामाग्री तथा गृहकार्य गराउने समेत कार्ययोजनामा उल्लेख गरिएको छ ।

यसका साथै कार्ययोजनामा विभिन्न शैक्षिक कार्यक्रमको उत्पादन तथा प्रसारण गर्ने, मूल्याङ्कन पक्रियामा सामयिक सुधार गर्ने, शिक्षक विद्यार्थी सम्पर्क क्रियाकलापमा नीजि क्षेत्रको सहयोग समेत परिचालन गर्ने, सरोकारवाला निकाय संग परामर्श तथा कार्ययोजना परिमार्जन गर्ने, समन्वय अनुगमन तथा मूल्याङ्कन गर्ने लगायतका पक्षहरु समेत समेटिएको छ ।