बाढीमा ज्यान गुमाएका परिवारलाई नेत्रावती डवजोङको आर्थिक सहयोग

धादिङ,७ असोज । धादिङको नेत्रावती डबजोङ गाउँपालिकाले बाढीमा ज्यान गुमाएका वडा नं १ साप्टारीका तीन युवाका परिवारलाई प्रतिपरिवार रु एक लाख एक हजार एक सय ११ आर्थिक सहयोग गरेको छ ।

गत भदौ १० गते आएको बाढीमा परी ज्यान गुमाएका कपिल सिम्खडा, अनिल राना मगर र सचिम अधिकारीका परिवारलाई सहयोग उपलब्ध गराइएको गाउँपालिकाका उपाध्यक्ष सीता माया चोदेनले जानकारी दिनुभयो ।

उहाँका अनुसार दिवङ्गतहरूको १३औँ पुण्यतिथिका अवसरमा जनप्रतिनिधिसहितको टोलीले घरमै पुगेर परिवारजनलाई सहयोग रकमको चेक हस्तान्तरण गरेको हो ।

उपाध्यक्ष चोदेनले सामाजिक सञ्जालमार्फत विपत्तिले धेरै परिवारलाई पीडा दिएको उल्लेख गर्दै दिवङ्गतप्रति श्रद्धाञ्जली तथा शोकाकुल परिवारजनमा समवेदना व्यक्त गर्नुभएको छ । नेत्रावती डवजोङ गाउँपालिकाले बाढिमा परि अभिभावक गुमाएका बालबालिकालाई कक्षा १२ सम्म बार्षिक ५० हजार शैक्षिक खर्च उपलब्ध गराउने निर्णय भएको समेत उपाध्यक्ष चोदनले बताउनुभयो ।

सहयोग हस्तान्तरण कार्यक्रममा गाउँपालिकाका प्रवक्ता एवं वडा नं १ का वडाध्यक्ष ठाकुर गुरुङलगायत जनप्रतिनिधि र स्थानीयवासीको सहभागिता थियो ।