धुनिबेँसीमा भोलि विद्यालय बिदा

धादिङ, ८ असोज : भारी वर्षा तथा सम्भावित बाढीपहिरोको जोखिमलाई ध्यानमा राख्दै धुनिबेँसी नगरपालिकाले भोलि असोज ९ गते नगरभित्रका सबै सामुदायिक तथा संस्थागत विद्यालयमा बिदा दिएको छ।

नगरपालिकाका प्रमुख प्रशासकीय अधिकृत विनोदकुमार खनालद्वारा आज जारी सूचनाअनुसार विद्यार्थी, शिक्षक तथा कर्मचारीको सुरक्षाका लागि एक दिन विद्यालय बन्द गर्ने निर्णय गरिएको हो।

सूचनामा असोज ९, १० र ११ गते देशका विभिन्न स्थानमा भारीदेखि अति भारी वर्षाको पूर्वानुमान रहेको उल्लेख छ। उक्त अवधिमा बाढी, पहिरो तथा डुबानको जोखिम हुन सक्ने जनाइएको छ।

शिक्षा तथा खेलकुद मन्त्रालयको असोज ७ गतेको पत्रसमेतका आधारमा आजको नगरप्रमुखस्तरीय निर्णयअनुसार विद्यालयमा बिदा दिइएको नगरपालिकाले जनाएको छ।