बागमतीका अर्थमन्त्री सरल सहयात्री धादिङ आउँदै

धादिङ, ७ कात्तिक । बागमती प्रदेश सरकारका आर्थिक मामिला तथा योजना मन्त्री एवं नेपाली कम्युनिस्ट पार्टीका बागमती प्रदेश समिति संयोजक सरल सहयात्री पौडेल भोली धादिङबेशी आउनुहुनेभएको छ ।

नेपाली कम्युनिस्ट पार्टी धादिङ जिल्ला समितिको आयोजनामा कात्तिक ८ गते आइतबार बिहान १० बजे धादिङबेँसीस्थित रायटारमा रहेको जिल्ला पार्टी कार्यालयमा भेटघाट कार्यक्रम आयोजना गरिएको छ ।

पार्टीको जिल्ला समितिले सार्वजनिक गरेको सूचनाअनुसार कार्यक्रममा मन्त्री पौडेलसँग जिल्लाका नेता तथा कार्यकर्ताले भेटघाट गर्नेछन्।

दसैँको अवसरमा आयोजना गर्न लागिएको उक्त कार्यक्रममा सहभागी हुन जिल्ला समितिले धादिङबेँसी तथा आसपासका क्षेत्रमा उपलब्ध पार्टीका नेता तथा कार्यकर्तालाई अनुरोध गरेको छ।

बागमती प्रदेश सरकारको आर्थिक मामिला तथा योजना मन्त्रालयको जिम्मेवारी सम्हालिरहेका पौडेलले गत भदौ ४ गते मन्त्रीको पदभार ग्रहण गरेका थिए ।