बाढीले क्षति पुर्‍याएका झोलुङ्गे पुल मर्मतपछि सञ्चालनमा, स्थानीयलाई आवतजावतमा सहज

धादिङ, ३१ असोज : भोटेकोशी नदीमा आएको विनाशकारी बाढीका कारण क्षतिग्रस्त भएका त्रिशूली करिडोरअन्तर्गतका झोलुङ्गे पुल मर्मत गरी पुनः सञ्चालनमा ल्याइएको छ। बाढीले क्षति पुर्‍याएका पुलहरूको पूर्वाधार विकास मन्त्रालयले मर्मत गरेसँगै धादिङका स्थानीय बासिन्दालाई आवतजावतमा सहज भएको छ।

बाढीका कारण पुलहरू क्षतिग्रस्त हुँदा नदी वारपार गर्न स्थानीय बासिन्दाले सास्ती खेप्दै आएका थिए। पुल मर्मतपछि स्थानीयको दैनिक आवतजावत सहज हुनुका साथै नदीपारिका बस्तीबीचको सम्पर्क पुनःस्थापित भएको छ।

विशेषगरी ग्रामीण क्षेत्रका नागरिकलाई विद्यालय, स्वास्थ्य संस्था, स्थानीय बजार तथा अन्य अत्यावश्यक सेवासम्म पुग्न झोलुङ्गे पुल महत्वपूर्ण माध्यमका रूपमा रहेका छन्। पुल पुनः सञ्चालनमा आएसँगै स्थानीय बासिन्दालाई दैनिक कामकाजका लागि एक स्थानबाट अर्को स्थानमा पुग्न सहज भएको छ।

भोटेकोशी नदीमा आएको बाढीले त्रिशूली नदीको बहाव बढाउँदा धादिङसहित नदी तटीय क्षेत्रका विभिन्न भौतिक संरचनामा क्षति पुगेको थियो। सडक, मोटरेबल पुल तथा झोलुङ्गे पुलमा क्षति पुग्दा कतिपय बस्तीको आवागमनसमेत प्रभावित भएको थियो।

क्षतिग्रस्त झोलुङ्गे पुलहरूको मर्मतसँगै बाढीबाट प्रभावित क्षेत्रको जनजीवन क्रमशः सहज बन्दै गएको छ। ग्रामीण बस्तीलाई जोड्ने यस्ता पुल सञ्चालनमा आउनुले स्थानीय नागरिकको दैनिक आवतजावतसँगै आर्थिक तथा सामाजिक गतिविधिलाई समेत सहज बनाउने अपेक्षा गरिएको छ। हाल भोटेकोशी नदीमा आएको बाढीले क्षति पुर्‍याएका १८ वटा झोलुङ्गे पुल मर्मत गरि संचालनमा आएको छ ।