धादिङमा हुलाक कार्यालय मार्फत घर घरमै राहदानी पुर्‍याईदै

धादिङबेशी, १५ वैशाख । धादिङमा अब हुलाक कार्यालयमार्फत घरघरमै राहदानी (पासपोर्ट) पुर्‍याउने सेवा सुरु गरिएको छ । जिल्ला प्रशासन कार्यालय धादिङ र हुलाक कार्यालय धादिङबीच आज सेवा सञ्चालनसम्बन्धी सम्झौता भएपछि राहदानी विभागबाट छापिएर आएका राहदानीहरू हुलाकमार्फत सेवाग्राहीको घरमै वितरण गरिने भएको   हो ।

सम्झौताअनुसार नीलकण्ठ नगरपालिका भित्र उक्त सेवा आजैदेखि लागू गरिएको छ भने जिल्लाका अन्य पालिकाहरूमा जेठ १ गतेदेखि सेवा विस्तार गरिने जनाइएको छ । अब राहदानी बनाउँदा नै सेवाग्राहीले आफ्नो ठेगाना स्पष्ट उल्लेख गरेपछि सोही आधारमा हुलाक कर्मचारीहरूले घरमै राहदानी पु¥याउने व्यवस्था मिलाइएको छ ।

प्रमुख जिल्ला अधिकारी बिजयराज सुवेदीका अनुसार हाल राहदानी वितरणबाट सुरु गरिएको यो सेवा छिट्टै नागरिकता, राष्ट्रिय परिचयपत्र तथा सवारी चालक अनुमति पत्र (लाइसेन्स) सम्म विस्तार गर्ने तयारी गरिएको छ। सरकारले सार्वजनिक सेवा सहज र पहुँचयोग्य बनाउने उद्देश्यसहित ल्याएको १०० दिने कार्ययोजनाअन्तर्गत हुलाक सेवालाई ‘गभरमेन्ट कुरियर सर्भिस’ का रूपमा विकास गर्दै यस्ता कागजात घरमै पुर्‍याउने नीति अनुरूप धादिङमा यो सेवा कार्यान्वयनमा आएको हो ।

हुलाक कार्यालय धादिङका कार्यालय प्रमुख नारायण प्रसाद पोखरेलले उपलब्ध जनशक्ति परिचालन गरी नीलकण्ठ नगरपालिका वडा न ३ मा सोही दिनमै अन्य स्थानमा सकेसम्म छिटो राहदानी पुर्‍याईने गरिने जानकारी दिनुभयो ।  सरकारी सेवा घरमै उपलब्ध हुने भएपछि सेवाग्राहीहरूमा उत्साह देखिएको छ।