जोखिम हेरेर विद्यालय खोल्न वा बन्द गर्ने निर्णय गर्न शिक्षा मन्त्रालयको आग्रह 

शिक्षा, विज्ञान तथा प्रविधि मन्त्रालयले कोरोना भाइरस महामारी बढेकोले जोखिम हेरेर स्थानीय तहहरूले आफ्नो क्षेत्रका विद्यालय बन्द गर्ने वा नगर्ने निर्णय गर्न सक्ने बताएको छ ।  शिक्षा मन्त्रालयका प्रवक्ता दीपक शर्माले आज विज्ञप्ति निकालेर कोरोना बढेकोले विद्यालयमा अनावश्यक भिडभाड हुने खालका वार्षिक उत्सव जस्ता कार्यक्रम नगर्न आग्रह गर्नुभएको छ ।

स्थानीय तहको निर्णय  अनुसार विद्यालय बन्द वा तोकिए बमोजिम सञ्चालन गर्न र बन्द गरिएका विद्यालयहरू पुनः सञ्चालन गर्दा विद्यालय सञ्चालन सम्बन्धी कार्यढाँचा २०७७ मा तोकिएको विधि तथा प्रक्रियाहरूको पालना गर्न शर्माले आग्रह गर्नुभएको छ । साथै विद्यालयहरू बन्द वा आंशिक रूपमा सञ्चालन भएको अवस्थामा विद्यार्थी सिकाइ सहजीकरण निर्देशिका ०७७ ले गरेको व्यवस्था गरे बमोजिम सिकाइ क्रियाकलापलाई निरन्तरता दिन पनि उहाँले अनुरोध गर्नुभएको छ । विद्यालय सञ्चालन गर्दा स्वास्थ्य सम्बन्धी सबै मापदण्ड पूर्ण रूपमा लागू गर्न पनि मन्त्रालयले आग्रह गरेको छ ।