पुनर्निर्माणमा संघसँग पर्याप्त समन्वय हुन सकेन : मन्त्री पौडेल

धादिङ, ८ कात्तिक । बागमती प्रदेशका आर्थिक मामिला तथा योजनामन्त्री सरल सहयात्री पौडेलले बाढीबाट क्षतिग्रस्त पुल पुनर्निर्माण र प्रभावित परिवारको आवास व्यवस्थापनमा संघीय सरकारसँग पर्याप्त समन्वय हुन नसकेको बताउनुभएको छ ।
धादिङबेँसीस्थित नेपाली कम्युनिस्ट पार्टीको जिल्ला कार्यालयमा आयोजित भेटघाट कार्यक्रमलाई सम्बोधन गर्दै उहाँले ठूला पुल निर्माण, आवासको ढाँचा र वैकल्पिक यातायात सञ्चालनका विषयमा संघ र प्रदेशबीच स्पष्ट समझदारी आवश्यक रहेको बताउनुभयो ।

विपन्न परिवारका लागि एक हजार घर निर्माण गर्ने कार्यक्रम प्रदेशको बजेटमा रहेको उल्लेख गर्दै मन्त्री पौडेलले बाढीप्रभावित परिवारलाई सो कार्यक्रमबाट सहयोग गर्न सकिने बताउनुभयो । घरको डिजाइन र निर्माणको ढाँचाबारे संघीय सरकारसँग छलफल आवश्यक रहेको उहाँको भनाइ थियो ।

प्रदेशले अघि बढाएको कामसँग संघको पछिल्लो निर्णय बाझिन नदिन सम्बन्धित संघीय मन्त्रीसँग छलफल गर्न प्रदेशका भौतिक पूर्वाधार विकासमन्त्रीलाई आग्रह गरेको उहाँले जानकारी दिनुभयो । सरकारहरूबीच पर्याप्त समन्वय हुन नसक्नु दुःखद भएको उहाँको भनाइ थियो ।

मन्त्री पौडेलले पाँच झोलुङ्गे पुल र दुई बेलिब्रिज निर्माणका लागि प्रदेश सरकारले खरिद प्रक्रिया अघि बढाइसकेको बताउनुभयो । त्रिशूली नदीको करिडोरमा आवागमन सहज बनाउने विषयमा संघीय सरकारले अघि बढाइरहेको काम र तत्काल अपनाउन सकिने विकल्पबारे प्रदेशलाई जानकारी दिनुपर्नेमा उहाँले जोड दिनुभयो ।

“सबभन्दा छिटो त्यहाँ आवागमन गर्ने उपाय के हुन्छ, त्योबारेमा ख्याल गर्नुप¥यो”, उहाँले भन्नुभयो । संघको कार्यक्षेत्रमा पर्ने आयोजनामा पनि समन्वय गरेर प्रदेशले काम गर्न सक्ने उहाँको भनाइ थियो ।

धादिङबेँसीसम्मको आवागमन सहज बनाउन उपयुक्त विकल्प पहिचान गरी कार्यान्वयनका लागि पहल गर्ने प्रतिबद्धता पनि उहाँले व्यक्त गर्नुभयो । यसका लागि संघीय सरकारसँग समन्वय गरेर अघि बढ्ने मन्त्री पौडेलले बताउनुभयो ।

बाढीपहिरोबाट क्षतिग्रस्त संरचना पुनर्निर्माणका लागि बजेट व्यवस्थापनको सम्भावना अध्ययन गर्न प्रदेश सरकारले टोली बनाएको उहाँले जानकारी दिनुभयो । उपलब्ध स्रोत परिचालन गर्दा धादिङ, नुवाकोट र रसुवालाई प्राथमिकतामा राख्दै प्रदेशका अन्य प्रभावित जिल्लाको आवश्यकतालाई समेत सम्बोधन गरिने उहाँको भनाइ थियो ।

सो अवसरमा मन्त्री पौडेलले धादिङबेँसीबाट तिप्लिङतर्फ जाने सडक र मुकुन्दसेन मार्गलाई बहुवर्षीय प्रक्रियामा लैजान पहल गर्ने प्रतिबद्धता व्यक्त गर्नुभयो ।