धादिङमा एक महिनामा ५७ फरार प्रतिवादी पक्राउ

धादिङ, ८ कात्तिक ।  जिल्ला प्रहरी कार्यालय धादिङले असोज महिनामा ५७ जना फरार प्रतिवादीलाई पक्राउ गरेको छ । अदालतबाट दोषी ठहर भई फरार रहेका व्यक्तिहरूलाई फैसला कार्यान्वयनका क्रममा पक्राउ गरिएको हो ।

जिल्ला प्रहरी कार्यालय धादिङले असोज महिनामा ८० वर्ष ९ महिना १८ दिन कैद र रु ९२ लाख ९८ हजार ५६६ जरिवानाको लगत कट्टा गरिएको छ । पक्राउ, मृत्यु तथा आफैँ हाजिर भएका व्यक्तिहरूको विवरणका आधारमा उक्त लगत कट्टा गरिएको हो ।
जिल्ला प्रहरी कार्यालयका धादिङका प्रवक्ता प्रहरी नायब उपरीक्षक प्रकाश दाहालका अनुसार असोज महिनामा विभिन्न प्रकृतिका ३९ वटा मुद्दा दर्ता भएका छन् । ती मुद्दामा संलग्न ३० जना प्रतिवादी पक्राउ परेका छन् । दर्ता भएका मुद्दामध्ये १९ वटा सामान्य, एउटा गम्भीर, दुईवटा जघन्य र १७ वटा दुई वर्षसम्म कैद सजाय हुने प्रकृतिका छन् ।

आर्थिक अपराधतर्फ बैंकिङ कसुरका दुई र ठगीको एउटा मुद्दा दर्ता भएका छन् । महिला, बालबालिका तथा ज्येष्ठ नागरिकविरुद्धका कसुरसम्बन्धी दुईवटा मुद्दा दर्ता भएको छ । प्रहरीले लागूऔषध नियन्त्रणका क्रममा चार किलो ६०० ग्राम गाँजासहित पाँच जनालाई पक्राउ गरेको छ । लागूऔषध ओसारपसारमा प्रयोग भएको एउटा स्कुटरसमेत बरामद गरिएको छ ।

त्यस्तै, असोज महिनामा धादिङ जिल्लाका विभिन्न स्थानमा ११ वटा सवारी दुर्घटना भएका छन् । ती दुर्घटनामा दुई जनाको मृत्यु भएको छ भने १३ जना घाइते भएका छन् । दुर्घटनामा परेका १३ जनाको उद्धार गरिएको छ । दुर्घटनामध्ये सातवटा तीव्र गतिसँग सम्बन्धित, दुईवटा ओभरटेकका कारण र दुईवटा अन्य कारणले भएको छ ।

ट्राफिक नियम उल्लङ्घन गर्ने २०९ वटा सवारीसाधनलाई कारबाही गरी रु दुई लाख १३ हजार राजस्व सङ्कलन गरिएको छ । उक्त अवधिमा २४० पटक सवारी चेकजाँच गरिएको थियो । असोज महिनामा धादिङमा आत्महत्याका पाँचवटा घटना भएका छन् । तीमध्ये तीन पुरुष र दुई महिला रहेका छन् । हराएका व्यक्तिहरु ११ जना फेला परेका छन् ।

घरेलु हिंसासम्बन्धी चारवटा उजुरी प्राप्त भएकामा दुईवटामा मिलापत्र भएको छ । एउटा उजुरी अदालत पठाइएको र अर्को एउटा उजुरीको कारबाही बाँकी रहेको प्रहरीले जनाएको छ ।

विपद् व्यवस्थापनतर्फ असोज महिनामा बाढीका दुईवटा घटनामा धादिङको बेनिघाट रोराङ गाउँपालिका स्थित खोलाले बगाएर एक जनाको मृत्यु भएको छ भने बुढीगण्डकी नदीमा आएको बाढिमा एक जनाको उद्धार गरिएको थियो । बुढिगण्डकी नदिमा एक्कासी आएको बाढीका कारण रु तीन करोड ६० लाख बराबरको क्षति भएको अनुमान गरिएको छ ।

यसैगरी, प्रहरीले शान्तिसुरक्षा कायम गर्न नियमित गस्ती, सवारी चेकजाँच तथा विशेष सुरक्षा परिचालनलाई निरन्तरता दिएको छ । धादिङ प्रहरीले असोज महिनामा २८५ पटक ग्रामीण गस्ती गरिएको छ ।