एनआरएनए विपद् व्यवस्थापन विभागको कमाण्ड (कोभिड-१९ हिरो) मनोज गोर्खालीलाई

गैरआवासीय नेपाली संघ (एनआरएनए) को विपद् व्यवस्थापन विभाग प्रमुखको जिम्मेवारी संघका आइसीसी उपाध्यक्ष मनोज कुमार श्रेष्ठ (गोर्खाली)लाई दिइएको छ । संघको ११४औँ बैठकले सन् २०२५–२७ कार्यकालका लागि परोपकार तथा मानवीय सहायता विभाग अन्तर्गतको यस महत्त्वपूर्ण विभागको नेतृत्व श्रेष्ठलाई सुम्पिएको हो। यो जिम्मेवारीसँगै गोर्खालीले आगामी दिनमा नेपालमा हुनसक्ने विभिन्न विपद्को पूर्वतयारी र व्यवस्थापनका लागि ठोस कार्ययोजना र कार्यविधि तयार पार्नुपर्ने छ ।

संघका अध्यक्ष डा. हेमराज शर्मा र महासचिव डा.चिरञ्जीवि खड्काद्वारा हस्ताक्षरित पत्रमा गोर्खालीलाई अप्रिल १५ सम्ममा बढीमा २५ सदस्यीय समिति र ५ जना विज्ञ सल्लाहकारहरू मनोनयन गरी सिफारिस गर्ने अधिकार समेत दिइएको छ।

१५ वर्षको सामाजिक अनुभव र कोभिड-१९ हिरो अवार्ड)
धादिङमा जन्मिएर लामो समयदेखि युएईलाई कार्यथलो बनाउँदै आएका श्रेष्ठ सामाजिक उद्यमशीलता र मानवीय सेवामा विगत १५ वर्षभन्दा लामो समयदेखि सक्रिय छन्। उनले यसअघि नै विपद्को समयमा आफ्नो कुशलता प्रदर्शन गरिसकेका छन् ।

श्रेष्ठको प्रमुख योगदानहरूः
विनाशकारी भूकम्प (२०१५) गोरखाको लाप्राक र बारपाक पुगेर प्रत्यक्ष राहत वितरण।

बाढी र हावाहुरीका कारण बाराको हावाहुरी पीडित र २०२० को बाढी पीडितलाई महत्त्वपूर्ण सहयोग।

कोभिड(१९ महामारीमा युएई सरकारसँग समन्वय गरी करिब २०० मिलियन रुपैयाँ बराबरको राहत र स्वास्थ्य सामग्री नेपाल पठाउन नेतृत्व। यसै कार्यको मूल्यांकन गर्दै दुबईका राजकुमार शेख हम्दान बिन मोहम्मद अल मकतूमले उहाँलाई प्रतिष्ठित ‘कोभिड(१९ हिरो अवार्ड) प्रदान गर्नुभएको थियो । जाजरकोट भूकम्पमा पनि उहाँले कुशल नेतृत्व प्रदान गर्नुभएको थियो ।एनआरएनएका पूर्व सचिव र मध्यपूर्व क्षेत्रीय संयोजक समेत रहिसकेका श्रेष्ठले सामाजिक सेवाबाहेक खेलकुद र शिक्षाको क्षेत्रमा पनि उत्तिकै योगदान पुर्‍याउँदै आउनुभएको छ ।