बागमती प्रदेश समन्वय परिषद् सदस्यमा सितामाया चोदेन नियुक्त

धादिङबेशी,१८ चैत्र । बागमती प्रदेश सरकार, मुख्यमन्त्री तथा मन्त्रिपरिषद्को कार्यालयले प्रदेश समन्वय परिषद्का सदस्यमा धादिङको नेत्रावती डवजोङ गाउँपालिकाकी उपाध्यक्ष सितामाया चोदेन गुरुङलाई नियुक्त गरेको छ ।

चोदेनलाई प्रदेश तथा स्थानीय तह (समन्वय तथा अन्तरसम्बन्ध) ऐन, २०७७ को दफा २४ को उपदफा १ (ङ) बमोजिम परिषद्को सदस्य पदमा नियुक्त गरिएको हो ।

चोदेनलाई पठाईएको पत्रमा प्रदेश समन्वय परिषद्को सदस्यमा तोकिएको जानकारी गराउँदै सफल कार्यकालको शुभकामना व्यक्त गरिएको छ । साथै परिषद्बाट हालसम्म भएका निर्णयहरू सम्बन्धित क्यूआर कोडमार्फत हेर्न सकिने व्यवस्था गरिएको उल्लेख गरिएको छ ।

प्रदेश समन्वय परिषद्ले प्रदेश र स्थानीय तहबीच समन्वय तथा सहकार्य सुदृढ गर्ने उद्देश्यले कार्य गर्दै आएको छ ।