काठमाडौंमा त्रिपुरासुन्दरीका २६५ लाभग्राहीको सामाजिक सुरक्षा परिचयपत्र नविकरण

धादिङ, साउन १२ गते ।
धादिङको त्रिपुरासुन्दरी गाउँपालिकाले काठमाडौंमा सञ्चालन गरेको सामाजिक सुरक्षा भत्ता परिचयपत्र नविकरण शिविरबाट २६५ जनाले सेवा लिएका छन्।

शिविर साउन ९ र १० गते आन्तरिक राजश्व कार्यालय परिसर, कलंकीमा सञ्चालन गरिएको थियो। गाउँपालिकाका उपाध्यक्ष देवराज धरेलका अनुसारस्थायी ठेगाना त्रिपुरासुन्दरी भए पनि हाल काठमाडौंमा बसोबास गरिरहेका लाभग्राहीलाई लक्षित गर्दै शिविर सञ्चालन गरिएको हो।
चालु आर्थिक वर्ष २०८२/८३ देखि अनिवार्य रूपमा बायोमेट्रिक प्रणालीमार्फत नविकरण गर्नुपर्ने भएकाले वर्षायामका कारण पालिका आफैँ पुग्न नसक्ने लाभग्राहीलाई मध्यनजर गर्दै पालिकाले यो पहल सुरु गरेको हो।

उपाध्यक्ष धरेलका अनुसार, काठमाडौंपछि चितवन र पोखरामा पनि यस्तै शिविर सञ्चालन हुने छ। चितवनको रत्ननगर नगरपालिका–२ को कार्यालय परिसर, टाँडीमा साउन १२ र १३ गते बिहान ८ बजेदेखि साँझ ५ बजेसम्म शिविर सञ्चालन हुनेछ।

त्यसैगरी, पोखरा महानगरपालिका–९ को कार्यालय परिसर, न्युरोडमा साउन १५ र १६ गते बिहान ८ बजेदेखि साँझ ५ बजेसम्म सामाजिक सुरक्षा भत्ता परिचयपत्र नविकरण शिविर सञ्चालन गरिनेछ।

पालिकाले सबै लाभग्राहीहरूलाई तोकिएको मिति, समय र स्थानमा अनिवार्य रूपमा उपस्थित भई परिचयपत्र नविकरण गर्न अनुरोध गरेको छ। सामाजिक सुरक्षा भत्ता वितरण कार्यविधि, २०७७ को दफा ४(४) अनुसार सबै लाभग्राहीले प्रत्येक वर्ष भदौ मसान्तभित्र परिचयपत्र नविकरण गर्नुपर्ने प्रावधान छ।