कांग्रेसको १५औँ महाधिवेशनमा पेशागत विषय विज्ञतर्फ केन्द्रिय महाधिवेशन प्रतिनिधिमा डा. प्रताप छत्कुलीको उम्मेदवारी

धादिङ, १२ असोज ।
नेपाली कांग्रेसको १५औँ महाधिवेशनअन्तर्गत पेशागत तथा विषय विज्ञतर्फ डा। प्रताप छत्कुलीले केन्द्रीय महाधिवेशन प्रतिनिधिका लागि उम्मेदवारी दिनुभएको छ।सुशासन तथा विकास विज्ञका रूपमा लामो समयदेखि कार्यरत डा.छत्कुलीले विकास, सार्वजनिक नीति तथा सुशासनका क्षेत्रमा हासिल गरेको अनुभवलाई पार्टीको नीति निर्माण र संगठन सुदृढीकरणसँग जोड्ने उद्देश्यसहित महाधिवेशन प्रतिनिधिमा उम्मेदवारी दिनुभएको बताउनुभएको छ।

नेपाली कांग्रेसको राजनीतिमा लामो समयदेखि सक्रिय रहनुभएका छत्कुलीले पार्टीको संगठनात्मक गतिविधिसँगै विकास र सुशासनका विषयमा समेत काम गर्दै आउनुभएको छ। उहाँले जापानमा पाँच वर्ष काम गरेको अनुभवसमेत हासिल गर्नुभएको छ।नेपाल सरकारका विभिन्न मन्त्रालय तथा सरकारी निकायसँग सुशासन र विकासका विषयमा विज्ञका रूपमा सहजीकरण गर्दै आउनुभएका छत्कुलीले सार्वजनिक प्रशासन, नीति कार्यान्वयन, विकास व्यवस्थापन तथा सुशासनका क्षेत्रमा काम गर्नुभएको छ।

कांग्रेसको १५औँ महाधिवेशन पार्टीको नियमित नेतृत्व चयनको प्रक्रियामात्र नभई बदलिँदो राजनीतिक, सामाजिक र आर्थिक परिवेशअनुसार पार्टीको नीति तथा कार्यदिशामाथि बहस गर्ने अवसरसमेत भएकाले विषय विज्ञहरूको सहभागिता महत्वपूर्ण हुने उहाँको धारणा छ।कांग्रेसले अहिलेको बदलिँदो परिस्थितिमा आफूलाई थप नीति तथा विचारमुखी पार्टीका रूपमा विकास गर्नुपर्नेमा उहाँले जोड दिनुभएको छ। राजनीतिक नेतृत्वसँगै विभिन्न पेशा, क्षेत्र र विषयमा अनुभव हासिल गरेका विज्ञहरूको ज्ञान तथा विज्ञतालाई पार्टीको नीति निर्माणमा प्रभावकारी रूपमा उपयोग गर्नुपर्ने उहाँको भनाइ छ।

विशेषगरी सुशासन, विकास, सार्वजनिक सेवा प्रवाह, आर्थिक विकास, नीति कार्यान्वयन र संस्थागत सुधार जस्ता विषयलाई पार्टीको राजनीतिक एजेन्डासँग जोड्नुपर्ने आवश्यकता रहेको छत्कुली बताउनुहुन्छ।उहाँले पार्टीभित्र नीतिगत बहसलाई बलियो बनाउने, जनताका विकाससम्बन्धी अपेक्षालाई पार्टीको नीति निर्माण तहसम्म पुर्‍याउने तथा सरकार सञ्चालनमा सुशासन र जवाफदेहितालाई प्राथमिकता दिने विषयलाई आफूले महत्त्वका साथ उठाउने बताउनुभएको छ।

पछिल्लो समय राजनीतिक दलहरूप्रति नागरिकका अपेक्षा परिवर्तन हुँदै गएको सन्दर्भमा कांग्रेसले पनि संगठनसँगै नीति र कार्यक्रमलाई थप जनमुखी बनाउनुपर्ने उहाँको धारणा छ। युवा पुस्तालाई पार्टीको नीति निर्माण र नेतृत्व प्रक्रियामा जोड्दै उनीहरूको ज्ञान, सीप र नवीन सोचलाई उपयोग गर्नुपर्नेमा समेत उहाँले जोड दिनुभएको छ।डा.छत्कुलीको उम्मेदवारीलाई कांग्रेसको १५औँ महाधिवेशनमा पेशागत तथा विषय विज्ञ समूहको प्रतिनिधित्वका दृष्टिले चासोका साथ हेरिएको छ। विकास र सुशासनको क्षेत्रमा काम गरेको अनुभवलाई पार्टीको आन्तरिक नीति निर्माण तथा संगठनात्मक भूमिकासँग जोड्ने उहाँको प्रयासलाई महाधिवेशनको बहससँग जोडेर हेरिएको छ।

कांग्रेसको विधानअनुसार श्रमिक, पेशागत क्षेत्र वा विषय विज्ञबाट समेत महाधिवेशन प्रतिनिधित्वको व्यवस्था रहेको छ।यही व्यवस्थाअन्तर्गत पेशागत विषय विज्ञका रूपमा उम्मेदवारी दिनुभएका डा। छत्कुलीले आफ्नो विज्ञता र अनुभवलाई पार्टीको नीति, संगठन र सार्वजनिक सरोकारका विषयमा उपयोग गर्ने प्रतिबद्धता व्यक्त गर्नुभएको छ।