त्रिशुली नदी किनार क्षेत्रका बासिन्दालाई सतर्क रहन अनुरोध

धादिङ, २४ असार । रसुवाको उत्तरी भेग उपल्लो क्षेत्रमै बढी बर्सात भएका कारण  त्रिशुली नदीमा पानीको बहाव उच्च बनेको छ । यस वर्षाले नदी आसपासका सडक, पुल लगायतका संरचनामा समेत क्षति पु¥याएको सूचना प्राप्त भएको छ । भीषण वर्षासँगैको बाढीले नेपाल–चीन जोड्ने मितेरी पुल बगाएको छ । यससँगै रसुवा हुँदै चीनसम्मको मार्ग बिच्छेद भएको छ ।

वर्षा निरन्तर जारी रहेका कारण त्रिशुली नदीको जलस्तर अझ बढ्न सक्ने अनुमान गरिएको छ । यस सन्दर्भमा धादिङ जिल्ला क्षेत्रको त्रिशुली नदी किनारका दुवै तर्फका बासिन्दाहरूलाई आवश्यक सतर्कता र सावधानी अपनाउन जिल्ला प्रशासन कार्यालय धादिङ तथा सम्बन्धित निकायहरूले अनुरोध गरेका छन् ।

संभावित बाढी, पहिरो तथा अन्य प्राकृतिक प्रकोपबाट हुनसक्ने क्षति न्यूनीकरणका लागि जोखिमयुक्त क्षेत्रका बासिन्दाहरूलाई सजग रहन र आवश्यक परेमा सुरक्षित स्थानतर्फ सर्न पनि आग्रह गरिएको छ । त्यस्तै, विपद् सम्बन्धी कुनै पनि आपत्कालीन जानकारी वा सहायता आवश्यक परेमा तत्काल नजिकको सुरक्षा निकाय वा प्रहरीको टोल फ्री नम्बर १०० वा १०१४ मा सम्पर्क गर्न अनुरोध गरिएको छ ।

स्थानीय तह, सुरक्षा निकाय र विपद् व्यवस्थापन समिति घटनाको अनुगमनमा सक्रिय रहेका छन् । नागरिकहरूलाई अफवाहमा नपरी, आधिकारिक स्रोतबाट प्राप्त सूचनाको आधारमा मात्र निर्णय लिन समेत आग्रह गरिएको छ ।

नुवाकोट जिल्लाको त्रिशुली नदीस्थित बेत्रावती जलमापन केन्द्रमा विहान ६:३० बजे लिएको मापन अनुसार जलसतहले सतर्कता तह पार गरेको जानकारी प्राप्त भएको छ।