रुबीभ्यालीमा तामाङ मातृभाषा लिपी सम्बन्धी प्रशिक्षण कार्यक्रम

धादिङ, १८ जेठ ।
रुबी भ्याली गाउँपालिकाले स्थानीय तहको भाषा नीति निर्माण तथा तामाङ मातृभाषा लिपी शिक्षा विषय सम्बन्धी प्रशिक्षण कार्यक्रम सुरु गरेको छ ।

पाँच दिन सम्म सञ्चालन हुने प्रशिक्षणमा भाषा नीति निर्माण तथा तामाङ मातृभाषामा शिक्षा लिपी विषयका बरिस्ठ प्रशिक्षक एवं तामाङ भाषाविद् अजितमान तामाङको उपस्थितिमा प्रशिक्षण कार्यक्रम सुरु भएको हो ।

तामाङ जातिको भाषा–लिपी जर्गेना गर्ने तथा भाषा सम्वन्धी प्रशिक्षण प्रदान गर्ने उद्देश्यले तामाङ–लिपी सम्वन्धी प्रशिक्षण सुरु गरिएको गाउँपालिकाका अध्यक्ष रामसिंह तामाङले बताउनुभयो । आफ्नो भाषा लिपीमा बोल्न मात्र नभई लेख्न समेत सिकाउने उद्देश्यले पहिलो पटक विद्यालयका शिक्षकहरुलाई भाषा प्रशिक्षण कार्यक्रम सुरु गरिएको तामाङले बताउनुभयो ।

कार्यक्रममा प्रमुख प्रशासकीय अधिकृत नविन कुमार गोलेले सबै विद्यालयमा तामाङ भाषाको लिपी पाठ्यक्रम सुरु गर्नुका साथै तामाङ भाषा, लिपि प्रवद्र्धन तथा सामुदायिक अधिकारलाई सुनिश्चितका लागि कार्यक्रम गरिएको बताउनुभयो ।