नीलकण्ठ नगरपालिकामा विषयगत शैक्षिक सामाग्री प्रदर्शनी,प्रदेश मन्त्री महर्जनद्वारा अवलोकन

धादिङ,१२ फागुन
नीलकण्ठ नगरपालिकाले शैक्षिक सामाग्री प्रदर्शनी कार्यक्रम गरेको छ । नगरपालिकाको शिक्षा युवा तथा खेलकुद शाखाको आयोजनामा विषयगत शैक्षिक सामाग्री प्रदर्शनी गरेको हो ।नगरपालिकाको वार्षिक कार्यक्रम अन्तरगत बालबालिकाहरूको क्षमतालाई उजागर गर्दै सामाजिक, गणित, विज्ञान, र शिक्षा लगायतका क्षेत्रमा रचनात्मकता र सीपको प्रदर्शनी गरिएको शिक्षा युवा तथा खेलकुद शाखा प्रमुख प्रकाश दत्त भट्टले बताउनुभयो ।

शिक्षा युवा तथा खेलकुद शाखा प्रमुख भट्टले भन्नुभयो, “हामीले राष्ट्रिय शिक्षा नीति अनुरूप विद्यालयका प्रयासलाई प्रदर्शनीका माध्यमबाट सार्वजनिक गरेका छौं, जसले विद्यार्थिहरू र शिक्षकहरूको वर्षभरिका मेहनतलाई उजागर गर्दछ।”विषयगत शैक्षिक सामाग्री प्रदर्शनी कार्यक्रम बागमती प्रदेशका खेलकुद तथा युवा मन्त्री मीन कृष्ण महर्जन, नेपाल नगरपालिका संघका अध्यक्ष तथा नीलकण्ठ नगरपालिकाका नगर प्रमुख भीम प्रसाद ढुंगाना,प्रमुख प्रशासकीय अधिकृत पुरुषोत्तम सुवेदी, नगरपालिकाका सल्लाहकार दिपक कोइराला, नेपाल नगर संघका सल्लाहकार सरोज अधिकारी लगायतले अवलोकन गर्नुभएको थियो ।उहाँहरुले बालबालिकालाई उत्साहित गर्दै, यस प्रकारका कार्यक्रमहरूको महत्वमा जोड दिनुभएको छ । नीलकण्ठ नगरपालिका भित्रका माध्यामिक विद्यालय तथा आधारभुत विद्यालयका विद्यार्थीहरुले नेपाली, अङ्ग्रेजी, गणित, र विज्ञान जस्ता विभिन्न विषयका शैक्षिक सामग्रीहरूको प्रदर्शन गरेका थिए ।