१७ औँ विश्व रेविज दिवसको अवसरमा सप्ताहव्यापी खोप अभियान सुरु

धादिङ,०७ असोज ।
१७ औँ विश्व रेविज दिवसको अवसरमा सप्ताहव्यापी रेविज रोग विरुद्ध खोप अभियान सुरु भएको छ । भेटेरिनरी अस्पताल तथा पशु सेवा विज्ञ केन्द्र धादिङ र नीलकण्ठ नगरपालिकाको संयुक्त आयोजनामा सप्ताहव्यापी अभिायन सुरु भएको हो ।

रेविज नियन्त्रण : एक स्वास्थ्य एक गन्तव्य भन्ने मुल नाराका साथ नीलकण्ठ नगरपालिका वडा नं २ वली डाँडामा एक कार्यक्रमका बिच अभयान सुरु गरिएको हो ।

सप्ताहव्यापी अभिायनको आज पहिलो दिन ४३ वटा सामुदायिक कुकुरमा एन्टिरेविज खोप लगाइएको भेटेरिनरी अस्पताल तथा पशु सेवा विज्ञ केन्द्र धादिङका प्रमुख डा।सन्दिप सिलवालले बताउनुभयो ।

आजदेखी सुरु भएको अभियान १३ गतेसम्म संचालन हुने हुँदा घर पालुवा÷सामुदायिक कुकुर तथा बिरालोहरुलाई निशुल्क रेविज रोग विरुद्ध खोप लगाइने भएकोले सम्बन्धित भेटेरिनरी अस्पताल तथा पशु सेवा विज्ञ केन्द्र धादिङमा आएर खोप लगाउन अनुरोध गरिएको छ ।

भेटेरिनरी अस्पताल तथा पशु सेवा विज्ञ केन्द्र धादिङका प्रमुख डा।सन्दिप सिलवालको अध्यक्षतामा भएको कार्यक्रममा भेटेरिनरी अस्पतालका कर्मचारी, नीलकण्ठ नगरपालिका पशुसेवा शाखा कार्यालयका पशु सेवा प्राविधिक, नगर प्रहरी लगायतको सहभागिता रहेको थियो ।

सन २०३० सम्ममा कुकुरको टोकाइबाट हुने मृत्युको अन्त्य गर्ने लक्ष्य रहेको हुँदा प्रत्यक बर्ष अभियानको रुपमा खोप कार्यक्रम संचालन हुँदै आएको छ।