धादिङबेशीमा रहेको श्रोत परिचालन साकोसद्धारा कैलाश सदस्य सेवा केन्द्र उद्धघाटन

धादिङ,०९ बैशाख ।
धादिङबेशीमा रहेको श्रोत परिचालन बचत तथा ऋण सहकारीले कैलाश सदस्य सेवा केन्द्रको कार्यालय उद्धघाटन गरेको छ । शुक्रबार गल्छी गाउँपालिका –७ मा श्रोत परिचालन साकोसले उक्त सेवा केन्द्रको उद्धघाटन गरेको हो ।

गुणस्तरीय वित्तिय समाधान सहितको उत्कृष्ट सहकारीको ध्येय तथा दिगो संस्था समृद्ध सदस्यको नाराका साथ संचालित श्रोत परिचालन बचत तथा ऋण सहकारी र कैलाश बचत तथा ऋण सहकारीले सहकारी विभागबाट स्वीकृत पश्चात् कैलाश सदस्य सेवा केन्द्र उद्धघाटन गरेको हो ।

उद्धघाटन कार्यक्रममा बोल्नुहुँदै गल्छी गाउँपालिकाका अध्यक्ष केदारनाथ खतिवडाले “सहकारी राष्ट्रको मेरुदण्ड भएको, सामाजिक पूंजी निर्माण तथा स्थानीय श्रोत साधनको उपयोगमा सहकारी र पालिकाबिच सहकार्य अपरिहार्य भएको बताउनुभयो । उहाँले सहकारीको एकिकरणले सदस्य सेवामा गुणस्तर वृद्धिहुने अपेक्षा सहित श्रोत परिचालन बचत तथा ऋण सहकारीको उत्तरोत्तर प्रगतिको शुभकामना व्यक्त गर्नु भएको थियो ।

वि.स २०५४ साल कार्तिक १२ गते २६ जना संस्थापकद्वारा ५२००० पूंजीबाट सुरु भएको संस्था हाल ६ करोड १९ लाख शेयर पूंजी, रु ५२ करोड ९२ लाख कुल सम्पत्ती र ६३७० जना सदस्य सहित आधुनिक प्रविधि, मोवाईल बैकिङ सेवा सहित निति र विधि मार्फत सदस्य सेवाकेन्द्रको शुभारम्भ भएको संस्थाको प्रमुख कार्यकारी अधिकृत दयानिधि नेपालले जानकारी गराउनुभयो ।

संस्थाका अध्यक्ष रुद्र बहादुर खत्रीको सभापतित्वमा भएको कार्यक्रममा गल्छी गाउँपालिकाका अध्यक्ष केदारनाथ खतिवडाको प्रमुख आतिथ्य रहेको थियो भने वडा नं ६ र ७ का वडा अध्यक्षहरुको आतिथ्य रहेको थियो ।