बजार अनुगमन टोलीद्धारा धादिङका थप ६ फर्मलाई कारबाही, ५० हजार जरिवाना

धादिङ,११ असोज ।
जिल्ला बजार अनुगमन टोली धादिङले जिल्लाको मुख्य मुख्य बजारहरुमा अनुगमनलाई तिब्र बनाएको छ । अनुगमन टोलीले सोमबार पृथ्वी राजमार्ग अन्तरगत धादिङ जिल्लामा सञ्चालित थप १२ होटल तथा खाजा घर, सप्लायर्स/किराना पसलहरुमा अनुगमन गर्दा उपभोक्ता हित विपरीत गर्ने ६ वटा फर्महरुलाई नगद जरिवाना सहित कारबाही गरेको छ ।

टोलिले बेनीघाट रोराङ गा.पा–३ शितल बजारको होटल तीन भाइलाई १० हजार, भैरवीनाथ भोजनालयलाई २० हजार, श्रवण होटललाई ५ हजार, गजुरी गा.पा.–२ मलेखुको दनै सप्लायर्सलाई ५ हजार, रावल सप्लायर्सलाई ५ हजार र सिद्धलेक गा.पा.–१, बैरेनीको वारीपारी इन्टरप्राइजेजलाई ५ हजार जरिवाना तिराइएको घरेलु कार्यालय धादिङले जनाएको छ ।

टोलीले अनुगमनको क्रममा १५ हजार ६ सय रुपैयाँ बराबरको म्याद गुज्रेका/सडेगलेका प्रयोग गर्न अयोग्य सामाग्रीहरु नष्ट गरेको छ । कारबाहीमा परेका फर्महरुले निर्धारित मुल्यभन्दा बढी रकम लिएको, सरसफाइमा ध्यान नदिएको, दर्ता नगरी सञ्चालनमा गरेको पाइएकोले जरिवाना तिराईएको घरेलु कार्यालय धादिङले जनाएको छ ।

जिल्लाका बिभिन्न स्थानमा अखाध्य बस्तुको बिक्री भएको, तोकिएको मुल्यभन्दा बढी रकम लिएको र सरसफाइमा ध्यान नदिएको भन्ने सुचनाको आधारमा प्रशासन, घरेलु लगाएतका सम्बन्धित निकायहरुले बजार अनुगमनलाई तीब्रता दिएको छ। जिल्ला अनुगमन टोलीले उपभोक्तालाई सचेत बन्न र गुनासो गर्ने बानी बसाल्न आग्रह समेत गरेको छ ।