धादिङबेशीमा मातातिर्थ औँशी लक्षित बजार अनुगमन

धादिङबेशी । मातातिर्थ औँशी (आमाको मुख हेर्ने दिन) लक्षित गरी मिठाइ पसलहरूमा अखाद्य मिसावट, लेबलिङ अभाव र सरसफाइमा लापरबाही भइरहेको भन्ने जनगुनासो आएपछि नीलकण्ठ नगरपालिकाले धादिङबेशी बजार क्षेत्रका ९ वटा मिठाई पसलमा अनुगमन गरेको छ।

नीलकण्ठ नगरपालिका वडा नं। ३ अन्तर्गत धादिङबेशी बजार क्षेत्रमा गरिएको उक्त अनुगमनमा स्थानीय जनप्रतिनिधि, उपभोक्ता संरक्षण हकहित समितिका प्रतिनिधि, नगर प्रहरी तथा संचारकर्मीहरुको सहभागिता रहेको थियो ।

अनुगमनका क्रममा अधिकांश पसलमा सरसफाइको अवस्था सन्तोषजनक नदेखिएको, उत्पादन सामग्रीमा आवश्यक लेबलिङ नभएको, नापतौलका उपकरणहरुहरु नेपाल गुणस्तर तथा नापतौल विभागद्वारा प्रमाणित नभएको तथा अखाद्य रंगको प्रयोग भएको पाइएको थियो । साथै, केही पसलमा उपभोग्य मिति समाप्त भएका तथा अखाद्य रंङ मिसिएको खाद्य सामग्री समेत भेटिएपछि ती वस्तुहरू तत्काल नष्ट गराइएको थियो ।

अनुगमन टोलीले व्यवसायीहरूलाई उपभोक्ताको स्वास्थ्यसँग प्रत्यक्ष जोडिएका यस्ता गम्भीर विषयमा लापरबाही नगर्न कडा निर्देशन दिँदै तत्काल सुधार गर्न सचेत गराएको छ । विशेषगरी चाडपर्वको समयमा गुणस्तरहीन तथा अखाद्य वस्तुको बिक्री वितरण नगर्न आग्रह गरिएको छ ।

नीलकण्ठ नगरपालिकाले आगामी दिनमा पनि यस्ता अनुगमन कार्यलाई निरन्तरता दिने जनाएको छ । उपभोक्ताको स्वास्थ्य र अधिकार संरक्षणलाई प्राथमिकतामा राख्दै बजार अनुगमनलाई थप प्रभावकारी बनाइने नगरपालिकाको प्रशासन शाखा अधिकृत लोकनाथ उपाध्यायले बताउनु भयो ।