धादिङको ज्वालामुखी गाउँपालिका नेपालकै पहिलो नमूना सफा तथा स्वच्छ गाउँपालिका घोषणा

धादिङबेशी । धादिङको ज्वालामुखी गाउँपालिकालाई नेपालकै पहिलो नमूना सफा तथा स्वच्छ गाउँपालिकाको रूपमा घोषणा गरिएको छ । आइतबार आयोजित विशेष समारोहमा डोल प्रसाद अर्यालको प्रमुख आतिथ्यतामा उक्त घोषणा गरिएको हो ।

गाउँपालिकाले दीर्घकालीन योजना अनुसार खानेपानी, सरसफाइ तथा स्वच्छता (WASH) सम्बन्धी विभिन्न कार्यक्रमहरू सञ्चालन गर्दै आएको थियो । पूर्ण सरसफाइ सुनिश्चित गर्न घरधुरी स्तरसम्म शौचालयको प्रयोग, सुरक्षित खानेपानीको पहुँच, फोहोर व्यवस्थापन तथा व्यक्तिगत सरसफाइमा सुधार ल्याउने अभियान सञ्चालन गरिएको थियो ।

गाउँपालिकाका अनुसार अधिकांश घरधुरीमा शौचालयको प्रयोग सुनिश्चित भएको, सुरक्षित पानीको पहुँच विस्तार भएको तथा हात धुने बानीमा उल्लेख्य सुधार आएको छ । साथै, विद्यालय, समुदाय तथा सार्वजनिक स्थानहरूमा सरसफाइको अवस्था मजबुत बनाइएको छ ।

यस अभियान अन्तर्गत “सफा र स्वच्छ क्षेत्र घोषणा” कार्यक्रम तीन चरणमा सञ्चालन गरिएको थियो । पहिलो चरणमा खुला दिसामुक्त घोषणा, दोस्रो चरणमा वडा स्तरमा सफा तथा स्वच्छ क्षेत्र घोषणा र अन्तिम चरणमा सम्पूर्ण गाउँपालिकालाई पूर्ण सरसफाइयुक्त घोषणा गरिएको हो ।

गाउँपालिकाले यो उपलब्धिलाई दीगो बनाउँदै आगामी दिनमा सरसफाइ र वातावरण संरक्षणलाई थप सुदृढ गर्ने प्रतिबद्धता जनाएको छ । साथै, यस अभियानलाई अन्य स्थानीय तहका लागि नमूना बनाउने लक्ष्य समेत राखिएको छ ।