कांग्रेसका उम्मेद्वार रमेश धमलाले गरे साधभन्ज्याङबाट मतदाता भेटघाटको औपचारिक सुभारम्भ

धादिङबेशी । नेपाली कांग्रेस धादिङ प्रतिनिधि सभा निर्वाचन क्षेत्र नम्बर २ का उम्मेदवार रमेशप्रसाद धमलाले मतदाता भेटघाट कार्यक्रमको औपचारिक सुभारम्भ गर्नुभएको छ ।  आगामी फागुन २१ गते हुने प्रतिनिधि सभा सदस्य निर्वाचनलाई लक्षित गर्दै उहाँले ज्वालामुखी गाउँपालिकाको साधभन्ज्याङबाट मतदाता भेटघाटको सुरुवात गर्नुभएको हो ।

नेपाली कांग्रेस धादिङका सहसचिव तथा निर्वाचन प्रचार–प्रसार समितिका संयोजक नवराज तिमल्सिनाका अनुसार क्षेत्र नम्बर २ अन्तर्गतका सबै पालिका, ५१ वटै वडा तथा टोलबस्तीमा पुग्ने लक्ष्यसहित भेटघाट कार्यक्रम तय गरिएको छ ।

निर्धारित कार्यतालिका अनुसार उम्मेदवार धमलाले प्रत्यक्ष रूपमा मतदातासँग संवाद गर्दै आफ्ना प्रतिबद्धता राख्ने कार्यक्रम अघि बढाइने उहाँले जानकारी दिनुभयो । निर्वाचनलाई प्रभावकारी बनाउन पार्टीले विभिन्न विषयगत समिति गठन गरिसकेको र ती सबै समितिहरूले आ–आफ्नो जिम्मेवारी अनुसार प्रचार–प्रसार तथा संगठन विस्तारका कार्यक्रम सुरु गरिसकेको तिमल्सिनाले बताउनुभयो ।