धादिङ–२ मा ‘CPN मिडिया सेन्टर’ उद्घाटन

धादिङबेशी । आगामी फागुन २१ गते हुने प्रतिनिधि सभा सदस्य निर्वाचनलाई लक्षित गर्दै प्रेस सेन्टर नेपाल धादिङले धादिङबेसीमा निर्वाचन केन्द्रित मिडिया डेक्स सञ्चालनमा ल्याएको छ । प्रेस सेन्टर नेपाल केन्द्रीय समितिको निर्देशनअनुसार प्रत्येक निर्वाचन क्षेत्रमा मिडिया डेक्स स्थापना गर्ने अभियानअन्तर्गत धादिङ निर्वाचन क्षेत्र नम्बर २ मा उक्त डेक्स स्थापना गरिएको हो ।

‘CPN मिडिया सेन्टर’ नाम दिइएको मिडिया डेक्सको बुधबार एक विशेष कार्यक्रमका बीच औपचारिक उद्घाटन गरिएको छ । उद्घाटन समारोहमा धादिङ क्षेत्र नम्बर २ का नेकपा उम्मेदवार रामबहादुर भण्डारी, जिल्ला संयोजक मनराज भण्डारी, समानुपातिक उम्मेदवार इन्दिरा ढुंगाना लगायत पार्टीका नेता तथा प्रेस सेन्टर नेपालका नेता तथा सदस्यहरुको उपस्थिति रहेको थियो ।

मिडिया डेक्समार्फत निर्वाचनमा प्रतिस्पर्धा गरिरहेका नेकपाका उम्मेदवारहरूको एजेन्डा, गतिविधि र कार्यक्रमलाई प्रभावकारी रूपमा प्रचार–प्रसार गरिने जनाइएको छ । साथै स्थानीय नागरिकका समस्या, गुनासा तथा सुझाव संकलन गरी सम्बन्धित उम्मेदवार र पार्टी नेतृत्वसम्म पु¥याउने काम पनि मिडिया डेक्समार्फत गरिने प्रेस सेन्टर धादिङले जनाएको छ ।

प्रेस सेन्टर धादिङका अनुसार छिट्टै धादिङ निर्वाचन क्षेत्र नम्बर १ मा पनि मिडिया डेक्स स्थापना गरिनेछ । निर्वाचन अवधिभर सूचना प्रवाह, जनसम्पर्क र जनताको आवाज उजागर गर्ने प्रमुख केन्द्रका रूपमा मिडिया डेक्सलाई प्रयोग गरिने जनाइएको छ ।