धादिङमा लागुऔषध नियन्त्रणका लागि अन्तरक्रिया

धादिङ, असोज २९ गते ।
धादिङमा लागुऔषध नियन्त्रणका लागि अन्तरक्रिया कार्यक्रम गरिएको छ । जिल्लाभित्र बढ्दै गएको लागुऔषध दुव्र्यसन नियन्त्रणका उद्देश्यले सुरक्षा निकाय, स्थानीय तह र सरोकारवाला संस्थाबीच समन्वय र सहकार्य सुदृढ बनाउन अन्तरक्रिया गरिएको हो ।

जिल्ला प्रशासन कार्यालय धादिङको आयोजनामा, जिल्ला समन्वय समितिको समन्वय र स्थानीय तहहरूको सहयोगमा धादिङबेसीमा कार्यक्रम आयोजना गरिएको हो।

कार्यक्रममा प्रमुख जिल्ला अधिकारी विजयराज सुवेदीले लागुऔषधको समस्या केवल कानुनी होइन, सामाजिक र मनोवैज्ञानिक चुनौती पनि भएको उल्लेख गर्नुभयो । उहाँले विद्यालय, अभिभावक, स्वास्थ्यकर्मी र सुरक्षाकर्मी सबै मिलेर यसको समाधानका लागि काम गर्नुपर्ने आवश्यकता औंल्याउनुभयो।

त्यसैगरी समन्वय समिति प्रमुख नवराज अधिकारीले दुव्र्यसनका कारण समाजमा अपराध र आत्महत्याका घटना बढ्दै गएको उल्ल्ेख गर्दै समस्याको दीर्घकालीन समाधानका लागि सुधार केन्द्र स्थापना गर्नुपर्ने सुझाव दिनुभयो।

युवाहरू साथी–सर्कलमा चुरोट सेवनबाट सुरु भई क्रमशः लागुऔषधको दुव्र्यसनमा फस्ने प्रवृत्ति बढ्दो रहेको नीलकण्ठ नगरपालिकाका नगर प्रमुख भीम प्रसाद ढुंगानाले बताउनुभयो । अभिभावक, विद्यालय र समुदाय सबै मिलेर सचेतना र निगरानीमा जोड दिनुपर्ने नगर प्रमुख ढुंगानाको भनाइ छ।

कार्यक्रममा जिल्ला प्रहरी कार्यालय धादिङले लागुऔषधसम्बन्धी अपराधमा विशेषगरी युवापुस्ता बढी जोखिममा रहेको जानकारी दिएको छ । कार्यलयले जनचेतना, निगरानी र पुनःस्थापना कार्यक्रमलाई सशक्त बनाउन सुझाव दिएको छ ।

कार्यक्रममा उपस्थित सहभागिहरुले विद्यालय स्तरदेखि नै सचेतना अभियान सञ्चालन गर्न, अभिभावक र समुदायस्तरमा चेतना अभाव घटाउन तथा पुनःस्थापना केन्द्रहरूको पहुँच विस्तार गर्न आवश्यक रहेकोमा जोड दिएका थिए।

प्रमुख जिल्ला अधिकारी विजयराज सुवेदीको अध्यक्षतामा सम्पन्न कार्यक्रममा जिल्ला समन्वय समिति धादिङका प्रमुख नवराज अधिकारीको प्रमुख आतिथ्यता रहेको थियो । कार्यक्रममा विभन्न स्थानिय तथा प्रमुख तथा उपप्रमुख, सुरक्षाकर्मी, शिक्षा, स्वास्थ्य, सामाजिक विकास तथा न्याय क्षेत्रका अधिकारी, पत्रकार र नागरिक समाजका प्रतिनिधिहरूको सहभागिता रहेको थियो ।