धादिङमा आफ्नै छोराद्धारा आमाको हत्या

धादिङ, असोज २० गते ।
धादिङको त्रिपुरासुन्दरी गाउँपालिका–५ थापाकठेरीमा एक युवकले आफ्नै आमाको हत्या गरेका छन् । ३० वर्षीय यमबहादुर कँडेलले धारिलो हतियार प्रहार गरी ५४ वर्षीया आमा राममाया कँडेलको हत्या गरेको जिल्ला प्रहरी कार्यालय धादिङका प्रहरी उपरीक्षक (एसपी) भेषराज रिजालले जानकारी दिनुभयो ।

प्रहरी उपरीक्षक (एसपी) रिजालका अनुसार घटनापछि यमबहादुरलाई आइतबार राति ९ बजे पक्राउ गरी जिल्ला प्रहरी कार्यालय धादिङ ल्याइएको छ ।

प्रहरी घटनास्थलमा पुग्दा कँडेल हातमा खुँडा बोकेर हिँडिरहेको अवस्थामा भेटिएका थिए । पछि उनी घरभित्र प्रवेश गरेपछि प्रहरीले उनलाई त्यहींबाट नियन्त्रणमा लिएको एसपी रिजालले जानकारी दिनुभयो ।

आफ्नै आमाको हत्या गर्नुको कारण भने खुल्न बाँकी रहेको र घटनाबारे थप अनुसन्धान भइरहेको प्रहरीले जनाएको छ ।