दशैँमा बढी भाडा असुली गर्ने ९ सवारीसाधनलाई कारबाही, १५० यात्रुलाई भाडा फिर्ता

धादिङबेशी ।  दशैँको अवसरमा काठमाडौँबाट धादिङ तथा जिल्लाभित्रका विभिन्न स्थानीय रुटमा सन्चालित सवारीसाधनहरुले यात्रुहरूसँग बढी भाडा लिएको गुनासो बढेपछि जिल्ला प्रहरी कार्यालय धादिङले विशेष चेकजाँच अभियान सञ्चालन गरेको छ ।

प्रहरीको ट्राफिकसहितको टोलीले जिल्लाका विभिन्न स्थानहरूमा गरेको निगरानीका क्रममा ९ वटा सवारीसाधनले यात्रुहरूसँग तोकिएको भन्दा बढी भाडा लिएको भेटिएको हो । यी सवारीसाधनहरूबाट १५० जना यात्रुहरूको दश हजार पाँच सय रुपैयाँ बराबरको भाडा फिर्ता गराइएको छ ।

त्यस्तै सवारी चालक तथा सवारीधनीलाई यस्ता क्रियाकलाप दोहोर्याए कानुनी कारबाही गरिने भन्दै सचेत समेत पारिएको छ । प्रहरीले सार्वजनिक चाडपर्वको समयमा सर्वसाधारणलाई सहज यात्रा सुनिश्चित गराउन सवारीधनीहरुलाई तोकिएको भाडादर पालना गर्न आग्रह गर्दै यात्रुहरूलाई पनि यस्ता गुनासो भएमा तुरुन्त जानकारी गराउन अनुरोध गरेको छ ।